Turqia kurrë nuk do të heqë dorë nga liria e shtypit, tha presidenti i vendit, duke theksuar se gazetarët duhet të përmbushin detyrën e tyre për të informuar publikun me saktësi dhe për të kontribuar në demokraci.

Në një mesazh me rastin e 10 Janarit, Ditën e Gazetarëve Aktivë, e cila shënohet që nga viti 1961 për të nderuar të drejtat e gazetarëve, Recep Tayyip Erdoğan tha se Turqia nuk do të heqë kurrë dorë nga liria e shtypit, duke siguruar që ato të mos abuzohen për të përhapur propagandë kundër vendit nga brenda ose jashtë.

Duke deklaruar se media është një element i domosdoshëm i demokracisë për të siguruar të drejtën e publikut për lajme, Erdoğan tha se gazetarët kanë një përgjegjësi demokratike dhe morale për të përmbushur një nevojë të rëndësishme për shoqërinë.

Erdoğan theksoi se kanalet e reja mediatike që ofrojnë lajme në emër të gazetarisë duhet gjithashtu të ndjekin parimet profesionale dhe etikën e shtypit.

“Në botën e sotme ku shpejtësia e informacionit është rritur në një mënyrë marramendëse, kuptimi i raportimit të saktë dhe të sinqertë është më i vlefshëm se kurrë. Prandaj, gazetarët gjithashtu kanë një përgjegjësi të madhe në luftën për të vërtetën kundër gënjeshtrës dhe dezinformimit”, tha ai.

Duke shprehur vlerësimin dhe mirënjohjen e tij për anëtarët e shtypit të cilët bënë përpjekje të përkushtuara për të përmbushur detyrat e tyre gjatë pandemisë, Erdoğan u lut për mëshirën e Allahut për ata gazetarë që humbën jetën gjatë kryerjes së detyrës.//AA