Prokuroria Themelore e Pejës sot në një konferencë për media ka bërë të ditur detaje të reja rreth rastit të helmimit të mbi 1 mijë e 500 qytetarëve në Deçan, që kishte ndodhur në korrik të vitit të kaluar.
Prokuroria ka ngritur aktakuzë ndaj dy zyrtarëve të kompanisë rajonale ‘Hidrodrini’. Prokurori i rastit, Dorjan Juniku tha se drejtori teknik i “Hidrodrinit” dyshohet për veprën penale “shkaktimi i rrezikut të përgjithshëm” dhe kimistja e kësaj kompanie dyshohet për veprën penale “mosevitim i rrezikut”.
“Në rastin konkret është e vërtetë se mbi 1,500 persona kanë kërkuar ndihmë mjekësore, mirëpo 872 kanë pasur simptome që i referohen helmimeve nga uji i pijshëm, për çka edhe nga raporti gastroenteritit epidemiologjik i Institutit Kombëtar të Shëndetësisë Publike është konstatuar se të njëjtit kanë pasur baterie Escherichia Coli dhe bakterin e njohur si Novo Virus, e shkaktuar nga mungesa e klorit rezedual dhe testimeve shumë të pakta dhe aspak të rregullta, siç përcaktohet edhe në udhëzimet administrative të po kësaj kompanie, pra ‘Hidrodrinit’ në Pejë”, tha Juniku.
Në korrik të vitit të kaluar, mbi 1,500 persona në Deçan dhe dhjetë fshatra përreth kishin kërkuar ndihmë mjekësore në Qendrën e Mjekësisë Familjare, për shkak se kishin simptome të helmimit. Prokurori Juniku tha se në mesin e personave që kërkuan ndihmë ishin edhe 51 fëmijë.
Pas rritjes së numrit të pacientëve që kërkonin ndihmë mjekësore, autoritetet lokale të Deçanit kishin rekomanduar qytetarët që të mos e përdornin për pije ujin e ujësjellësit në këtë komunë. Për më tepër, Komuna e Deçanit kishte njoftuar se ka nisur hapa për të themeluar një ndërmarrje të re komunale, me qëllim që të shkëputet nga “Hidrodrini”.
“Hidrodrini”, përveç Deçanit, furnizon me ujë edhe Pejën, Istogun, Klinën dhe Junikun. Helmimi i mijëra qytetarëve bëri që kjo komunë më 13 korrik 2021 të shpallë gjendje emergjente.
