Autoritetet në Kinë kanë ekzekutuar një ish-drejtues kompanie i dënuar për vrasjen e biznesmenit miliarder Lin Qi, një figurë e njohur edhe si producent ekzekutiv i serialit të Netflix “The Three-Body Problem”. Sipas mediave lokale, i ekzekutuari Xu Yao u shpall fajtor për helmimin e Lin Qi në vitin 2020, pas një konflikti të brendshëm në kompaninë Yoozoo Games, e cila zotëron të drejtat për adaptimin e trilogjisë së njohur shkencore-fantastike “The Three-Body Problem”.

Hetimet zbuluan se Xu Yao kishte blerë substanca toksike online dhe kishte përdorur kërpudha helmuese që përmbanin përbërës shumë të rrezikshëm, të cilat më pas i kishte vendosur në pije dhe kapsula, duke ia ofruar viktimës dhe disa punonjësve të tjerë të kompanisë. Lin Qi u sëmur rëndë në dhjetor 2020 dhe ndërroi jetë më 25 dhjetor në moshën 39-vjeçare, ndërsa disa persona të tjerë, përfshirë një tjetër producent dhe bashkëshorten e tij, mbijetuan pas helmimit.

Xu Yao u dënua me vdekje në vitin 2024, ndërsa ekzekutimi i tij u krye më 21 maj, sipas raportimeve të mediave kineze. Kompania Yoozoo Games e ka konfirmuar rastin, duke deklaruar se drejtësia “u vu në vend”. Ngjarja lidhet me periudhën kur kompania ishte e përfshirë në marrëveshje të rëndësishme ndërkombëtare për adaptimin e romanit të autorit Liu Cixin, vepra e të cilit “The Three-Body Problem” është kthyer në një fenomen global dhe ka fituar çmime prestigjioze si Hugo Award.

© BalkanWeb
Për t’u bërë pjesë e grupit "Balkanweb" mjafton të klikoni: Join Group dhe kërkesa do t’ju aprovohet menjëherë. Grupi Balkanweb
Etiketa: