Ushtria amerikane njoftoi se ka përfunduar një “valë të rëndë” sulmesh ajrore ndaj objektivave të Gardës Revolucionare Islamike (IRGC) në Iran, në përgjigje të sulmeve me raketa balistike të ndërmarra një ditë më parë kundër forcave amerikane në Jordani dhe anijeve që lundronin në Ngushticën e Hormuzit.
Komanda Qendrore e SHBA-së (Centcom) bëri të ditur se gjatë operacionit u goditën dhjetëra objektiva ushtarake, përfshirë qendra komande, baza raketash dhe dronësh, sisteme mbikëqyrjeje, pozicione të mbrojtjes bregdetare dhe kapacitete detare të IRGC-së. Sipas Centcom, të gjitha raketat e lëshuara nga Irani drejt forcave amerikane u interceptuan me sukses.
Nga ana tjetër, mediat shtetërore iraniane raportuan se sulmet amerikane shkaktuan viktima civile. Sipas agjencisë Fars, tre anëtarë të së njëjtës familje, mes tyre një fëmijë dyvjeçar, humbën jetën pas goditjes së një banese në ishullin Qeshm. Sulme u raportuan gjithashtu në zonat e Abadanit dhe në rajone të tjera në jug dhe perëndim të Iranit.
Përshkallëzimi i fundit vjen në një javë të tensionuar, gjatë së cilës SHBA-ja dhe Arabia Saudite zhvilluan për herë të parë sulme të përbashkëta të shpallura publikisht kundër grupeve të mbështetura nga Irani në Irak. Sipas Centcom, operacionet në Irak ishin përgjigje ndaj mbi 30 sulmeve me dronë të lidhura me IRGC-në brenda 72 orëve.
Forcat paraushtarake të Mobilizimit Popullor (PMF) në Irak deklaruan se të paktën 20 anëtarë të tyre u vranë gjatë sulmeve amerikano-saudite, ndërsa presidenca irakiane i dënoi bombardimet, duke i cilësuar si shkelje të sovranitetit të vendit. Megjithatë, presidenti amerikan Donald Trump deklaroi se operacionet ishin koordinuar me autoritetet irakiane.
Konflikti mes Uashingtonit dhe Teheranit është rindezur pas disa ditësh qetësie relative. Megjithëse Trump kishte folur për “negociata shumë miqësore”, autoritetet iraniane mohuan se po zhvilloheshin bisedime diplomatike.
Pas sulmit iranian ndaj një baze amerikane në Jordani, Trump paralajmëroi një kundërpërgjigje të ashpër. “Do t’i godasim shumë fort, sepse tani është radha jonë. Ata e dinë se çfarë po vjen”, deklaroi ai nga Shtëpia e Bardhë.
Ndërkohë, Garda Revolucionare Islamike njoftoi se kishte shënjestruar një bazë ajrore amerikane dhe një qendër komande në Jordani, duke pretenduar se veprimi ishte përgjigje ndaj operacioneve ushtarake amerikane. Ajo deklaroi gjithashtu se forcat e saj detare goditën tre cisterna nafte në Ngushticën e Hormuzit, duke i akuzuar se kishin shpërfillur paralajmërimet iraniane.
Përshkallëzimi i luftimeve tregon se konflikti mes SHBA-së dhe Iranit vazhdon të thellohet, pavarësisht përpjekjeve të deklaruara për uljen e tensioneve, ndërsa shqetësimet për destabilizimin e mëtejshëm të Lindjes së Mesme mbeten të larta.
