Kombëtarja spanjolle humbet një tjetër senator. Jordi Alba ka vendosur të thotë mjaft dhe të përqendrohet vetëm te Inter Miami. Mbrojtësi i krahut, pasi u largua nga Barcelona për t’u lënë vend brezave të rinj, bën të njëjtën gjë edhe me përfaqësuesen, teksa siç shkruajnë mediat, ai ka vendosur të largohet nga kombëtarja.
Statistikat e tij janë vërtetë interesante. Jordi Alba mbahet mend si kampion i Kampionatit Evropian në 2012 dhe i Ligës së Kombeve në 2023, gjithashtu vlen të theksohet se ka qenë i pranishëm në tre Kupa Bote (2014, 2018 dhe 2022), tre kampionate evropiane (2012, 2016 dhe 2021), dhe një herë në Kupën e Konfederatave (2013).
Siç raporton shtypi iberik, vendimi është marrë javë më parë dhe lojtari ka njoftuar menjëherë Federatën dhe trajnerin Luis de la Fuente, i cili do të dëshironte ta kishte në grup në Euro 2024 duke pasur parasysh përvojën e tij të madhe, e cila do të kishte qenë e dobishme për ecurinë. 34-vjeçari Alba numëron 93 ndeshje me Spanjën.
(BalkanWeb)
