Marrëveshja mes SHBA dhe Iranit duket se ka avancuar. Mediat e huaja raportojnë se Irani është zotuar se nuk do të prodhojë armë bërthamore, ndërsa kjo marrëveshje pritet që të nënshkruhet të premten.

Eksportet e naftës së Iranit do të rifillojnë dhe do të krijohet një plan për të mundësuar zhvillimin ekonomik të vendit, sipas një projektmarrëveshjeje midis Iranit dhe Shteteve të Bashkuara të parë nga mediat.

Sipas Bloomberg, në draft thuhet se Departamenti i Thesarit i SHBA-së do të lëshojë përjashtime për eksportet e naftës bruto iraniane dhe produkteve petrokimike menjëherë pas nënshkrimit të marrëveshjes.

Ndërsa sipas informacioneve të deritanishme thuhet se marrëveshja është në përputhje me informacionet që janë raportuar më parë.

Përveç kësaj, vendet do të sigurojnë që trafiku detar përmes Ngushticës së Hormuzit të kthehet në nivelet e para luftës brenda 30 ditëve. SHBA-të gjithashtu do të tërheqin forcat ushtarake nga afërsia e Iranit.

Sipas draftit, Shtetet e Bashkuara dhe partnerët e saj rajonalë do të krijojnë gjithashtu një plan për të rehabilituar Iranin dhe për të mundësuar zhvillimin ekonomik të vendit, me financim prej të paktën 300 miliardë dollarësh.

Al-Arabiya me seli në Dubai raporton gjithashtu informacione të qëndrueshme në lidhje me draftin.

As SHBA-ja dhe as Irani nuk e kanë bërë publike draft-marrëveshjen, por SHBA-ja ka filluar ta ndajë tekstin me vendet aleate në samitin e G7-ës në Francë, sipas një personi me njohuri për çështjen.