Merkato e Flamurtarit sa i takon emrave ka qenë ndër më të mirat këtë verë në Superligë, por vlonjatët shpresojnë të mos ndalen këtu.
Pas Augustin Torrasa-s po synohet të afrohet një tjetër ish-futbollist i Partizanit, Caleb Ekuban, i cili aktualisht është pjesë e Leeds United, ekip që drejtohet nga Marselo Bielsa.
Ky i fundit në një intervistë për mediat angleze ka deklaruar se italo-ganezi nuk është në planet e tij, pasi ka dy sulmues të tjerë në skuadër:
“Kur ke shumë lojtarë në të njëjtin rol, është e pamundur që t’i mbash të gjithë. E mira është që Ekuban të gjejë një skuadër tjetër për huazim dhe të ketë minutat e duhura në dispozicion.”
Problem për transferimin e 24-vjeçarit mbetet paga e madhe që ai përfiton në Angli, por në Vlorë po ëndërrojnë që administratori Sinan Idrizi të bëjë një sforco të fundit në prag të mbylljes së merkatos.
(BalkanWeb)