TIRANE– “Sistemi i ri i patronazhimit të spitaleve rajonale nga spitalet universitare nis në muajin Janar përmes një plani të qartë të Ministrisë së Shëndetësisë dhe Mbrojtjes Sociale”. Deklarata u bë sot nga Ministrja e Shëndetësisë Ogerta Manastirliu, gjatë prezantimit të drejtorit të ri të Spitalit Universitar të Traumës, Arben Zenelaj.
Spitali Universitar i traumës do të ketë në patronazh spitalet e Gjirokastrës, Vlorës dhe Fierit, ku do të dërgojë mjekë specialist sipas nevojave të spitaleve rajonale. Ndërkohë që “Shefqet Ndroqi” do të asistojë spitalet e Shkodrës, Lezhës dhe Kukësit dhe QSUT spitalet e Elbasanit, Korçës, Beratit dhe Dibrës.
Manastirliu u shpreh se ky plan jo vetëm që ofron shërbim të specializuar mjekësor aty ku janë nevojat e qytetarëve, por ndihmon dhe në formimin profesional të mjekëve në spitalet rajonale. Duke vlerësuar rritjen e cilësisë së shërbimit që ofrohet në këtë spital me investimet e fundit të Qeverisë, Ministrja e Shëndetësisë dhe Mbrojtjes Sociale siguroi se do të vijojnë investimet edhe në spitalet rajonale në infrastrukturë dhe pajisje mjekësore gjatë vitit 2018, për të rritur cilësinë e shërbimit sa më pranë vendbanimit të qytetarëve.
(BalkanWeb)
