U zhvillua të martën Kuvendi VII i Riorganizimit të Lidhjes së Shkrimtarëve dhe Artistëve të Shqipërisë (LSHA), një aktivitet me rëndësi për jetën kulturore dhe letrare në vend. Në punimet e tij morën pjesë delegatë nga degët e LSHA-së, si dhe përfaqësues të shoqatave, klubeve letrare dhe organizatave kulturore nga Shqipëria dhe trevat shqiptare në rajon.
Kuvendi u zhvillua në një atmosferë diskutimesh të hapura, ku u theksua nevoja për modernizimin e veprimtarisë së LSHA-së, forcimin e bashkëpunimit kulturor brenda hapësirës shqiptare dhe në nivel ndërkombëtar, si dhe mbështetjen më të madhe për krijimtarinë letrare e artistike në kushtet e zhvillimeve të reja shoqërore.
Pas përfundimit të votimit të fshehtë dhe numërimit të votave nga Komisioni i Votimit, u shpall fitues me shumicë absolute dr. Mujë Buçpapaj, poet, studiues i letërsisë, pedagog universitar dhe botues i gazetës kulturore “Nacional”.
Gjatë Kuvendit u vlerësua edhe figura e tij si një prej zërave aktivë të kulturës bashkëkohore shqiptare, me kontribute në drejtimin e institucioneve kulturore dhe në promovimin e letërsisë shqiptare në arenën ndërkombëtare.
Punimet u përshëndetën edhe nga përfaqësues të Lidhjes së Shkrimtarëve të Kosovës dhe organizatave kulturore nga rajoni, të cilët vlerësuan rolin e LSHA-së në ruajtjen dhe zhvillimin e identitetit kulturor shqiptar.
Lidhja e Shkrimtarëve dhe Artistëve të Shqipërisë, e themeluar në vitin 1945, pas viteve ’90 është riorganizuar si një strukturë pluraliste, duke vijuar të mbetet një nga institucionet kryesore të jetës letrare dhe artistike në vend.
