Calin Georgescu është ndaluar në Rumani, ndërsa prokurorët thanë se po hetonin ish-kandidatin presidencial rumun për mashtrim.

Georgescu, një politikan pro-rus i cili bëri bujë për herë të parë gjatë zgjedhjeve presidenciale të Rumanisë në vitin 2024, u ndalua nga policia dhe Drejtoria për Hetimin e Krimit të Organizuar dhe Terrorizmit (DIICOT) të hënën.

Ai u mor në pyetje nën dyshimet për mashtrim dhe formimin e një grupi të organizuar kriminal.

Prokurorët akuzuan Georgescun dhe dy të tjerë për mashtrimin e një biznesmeni rumun duke e bërë atë të besonte se mund të merrte akses në financim nga bankat e huaja me vlerë deri në 15 milionë euro në këmbim të parave të gatshme.

“Në këto rrethana, autorët e krimit e bindën viktimën të transferonte mbi 1,000,000 euro”, tha DIICOT në një njoftim për shtyp, duke shtuar se më vonë ata “e bindën viktimën të transferonte një shumë tjetër prej 100,000 eurosh”.

Grupi e paraqiti veten si “biznesmenë të begatë dhe drejtues të kompanive të huaja që dyshohet se kishin shuma të mëdha parash në dispozicion për t’u dhënë hua viktimave – të cilët synonin të zgjeronin bizneset e tyre në Rumani – me kusht që të paraqisnin garanci financiare”, shtoi ajo.

Disa nga mbështetësit e Georgescu-t u mblodhën jashtë selisë së DIICOT ndërsa ai u mor në pyetje, duke mbajtur flamuj dhe ikona fetare ndërsa brohorisnin “liri për Calin”.

Georgescu po përballet tashmë me dy raste të tjera, njëra që përfshin akuza se ai veproi kundër rendit kushtetues të Rumanisë dhe njëra në të cilën ai akuzohet për promovimin e ideologjisë fashiste.

Georgescu u bë i famshëm në vitin 2024, pasi fitoi raundin e parë të zgjedhjeve presidenciale të Rumanisë. Gjykata Kushtetuese e Rumanisë më vonë i anuloi zgjedhjet, duke përmendur akuzat për ndërhyrje zgjedhore.

Duke folur për BBC-në përpara raundit të dytë në dhjetor të atij viti, politikani nacionalist tha se do t’i jepte fund çdo mbështetjeje për Ukrainën nëse zgjidhej, duke mohuar gjithashtu se ndikimi rus e kishte ndihmuar fushatën e tij.