PAA ka akuzuar sot kryeministrin Edi Rama dhe ministrin e brendshëm Sandër Lleshaj, për mentalitet denigrues për disa qindra punonjës policie që i kanë shërbyer me përkushtim dhe dashuri policisë së shtetit edhe në kohët e saj më të vështira.
“Askush nuk duhet ti hapë rrugën askujt. Kushdo duhet të meritojë plotësisht vendin që synon. Policia e shtetit, Garda e Republikës dhe Ushtria duhet të jenë institucionet kombëtare ku politika nuk duhet të zgjasë duart elektorale dhe nepotike.” – thuhet në deklaratën e PAA shpërndarë mediave.
Deklarata e plotë:
Mentaliteti i Rama dhe Lleshaj është denigrues për disa qindra punonjës policie që i kanë shërbyer me përkushtim dhe dashuri policisë së shtetit edhe në kohët e saj më të vështira.
Askush nuk duhet ti hapë rrugën askujt. Kushdo duhet të meritojë plotësisht vendin që synon.
Policia e shtetit, Garda e Republikës dhe Ushtria duhet të jenë institucionet kombëtare ku politika nuk duhet të zgjasë duart elektorale dhe nepotike.
Në vitin 1997 Qeveria e Pajtimit Kombëtar bëri thirrje publike në TV që ish-policët dhe ish-ushtarakët të riktheheshin dhe të shërbenin për rivendosjen e rendit publik.
Të mos kujtohemi për policët dhe ushtarakët vetëm në kohë krizash.
Në asnjë vend demokratik kriteri i përzgjedhjes dhe promovimit të policëve dhe ushtarakëve nuk varet nga bukuria sipërfaqësore apo nga tiparet dhe përmasat fizike.
Përzgjedhja dhe promovimi i tyre ndjek një rrugë dhe rregulla strikte të karrierës profesionale.
Ky mentalitet pasqyron tendenca arrogance dhe abuzuese.