Me shpresën për të shpëtuar një sezon deri tani zhgënjyer Manchester United vendos një rekord në merkaton e janarit, duke bërë blerjen më të shtrenjtë në këtë sesion të tregut të transferimeve. Prej javës në tratativa, “Djajtë e Kuq” kanë arritur marrëveshjen me Sporting Lisbona, që sjell në Premier League Bruno Fernandes.
Mesfushorit portugez ishte në shenjestrën e shumë klubeve të tjerë të mëdhenj të Europës, por Manchester United ka mundur të gjithë rivalët, duke paguar rreth 80 milion euro për kartonin e tij. Kjo është shifra më e lartë e shpenzuar në këtë merkato dimri, ndërsa mediat angleze kanë zbuluar edhe detajet e tjera financiare të këtij operacioni. Kështu, Bruno Fernandes do të firmosë një kontratë 4-vjeçare, nga e cila do të fitojë 6 milion euro në sezon.
Futbollisti do të zhvillojë të enjten testet mjekësore, përpara firmës dhe prezantimit zyrtar si lojtari më i ri i Manchester United. Një blerje e rëndësishme, që i jep më shumë alternativa Ole Gunnar Solskjaer në misionin e skuadrës së tij për të siguruar një vend në Champions sezonin e ardhshëm. Një objektiv aspak I lehtë, pasi “Djajtë e Kuq” renditen në vendin e pestë me gjashtë pikë më pak rivalët direktë të Chelsea.
(balkanweb)
