Historia e trishtë e një gruaje vjen sot në studion e emisionit “Me Zemër të Hapur” në News 24. Ermira është nëna e dy fëmijëve, disa vite më parë u martua me mblesëri me njeriun që i gjeti i ati.

Fillimisht martesa shkonte mirë, më pas bashkëshorti luante lojëra fati dhe i shpenzonte të gjitha lekët duke u treguar i papërgjegjshëm për situatën në familje.

Në janar të këtij viti teksa ndodheshin në shtëpinë e prindërve të saj pas disa telefonatave ai e ka akuzuar për raporte të tjera, kjo e ka acaruar aq shumë Ermirën sa vendosi t’i jepte një herë e mirë fund kësaj martese në të cilën edhe është dhunuar.

“Ishte data 1 Janar e Vitit të Ri. Bëra drekën e Vitit të Ti me familjarët e mi në shtëpinë ku jetonim me qira. Në 2 në darkë më vjen një telefonatë për urimin e vitit të ri, bashkëshorti u bë xheloz. Unë i thashë që ishte kunata e motrës, por në të vërtetë ishte një shoku im i fëmijërisë që më shkruan, nuk e di nga e kishte gjetur numrin. Unë i thashë që ishte kunata se ai ishte pak i dehur, por filloi jo unë të mbaj për hatër, jo kështu, jo ashtu, jo t’i duhesh vrarë. Aty vendosa të mos kthehem më. Në datë 3 i vdes nusja e xhaxhit, më thotë hajde, i thashë nuk vij më, mes nesh ka mbaruar”,- tregon Ermira.

Më pas, ajo shkoi në Gjykatën e Elbasanit dhe bën divorcin, fëmijët i ka ajo në kujdestari, por djalin e ka shumë të sëmurë dhe ka nevojë për mbështetje.

Që kur janë ndarë ish-burri nuk ka paguar asgjë për fëmijët. Ermira kërkon ndihmë sepse edhe në shtëpinë e prindërve nuk ndihet komode dhe ajo që e shqetëson më shumë është gjendja e të birit 6-vjeçar.

“Ai pretendonte se unë kisha probleme mendore dhe se kisha pasur edhe lidhje të tjera. Ka arritur ka kapur thikën ndaj meje. Vajza ka qënë prezente dhe këtë pjesë nuk e heq nga koka. Vajza është fiksuar tani që babai i saj do të më vrasë mua, e urren”,- shton ajo.

Por ndërsa bënte thirrje që ish-burri t’i përgjigjj duke paguar detyrimin mujor për fëmijët e tij, në studion e emisionit telefonon ish-vjehrra, e cila shton dozën e akuzave ndaj Ermirës.

“Djali për momentin është në Maqedoni, nuk kemi numër ne prindërit. Ajo po të ishte e mirë rrinte me djalin tim, nuk bënte kurvëri në telefon. I di ajo historitë që kur ishte në fejesë. Të ketë turp që vjen aty në emision…E ka kapur edhe më herët djali im me ato gjëra”, akuzoi ish-vjehrra pa u fokusuar tek fakti që nipërit e saj vuajnë për bukën e gojës.

(m.a/BalkanWeb)

Për t’u bërë pjesë e grupit "Balkanweb" mjafton të klikoni: Join Group dhe kërkesa do t’ju aprovohet menjëherë. Grupi Balkanweb