Partia në pushtet e presidentit Vladimir Putin, Rusia e Bashkuar, ka fituar zgjedhjet parlamentare në Rusi, duke siguruar 57.83% të votave dhe 355 nga 450 mandatet në Dumën Shtetërore, sipas rezultateve paraprake të Komisionit Qendror të Zgjedhjeve. Të dhënat janë bazuar në numërimin e më shumë se 95% të votave.

Rezultati i jep partisë së Putinit një shumicë kushtetuese në Dhomën e Ulët të Parlamentit rus. Në zgjedhjet e vitit 2021, Rusia e Bashkuar kishte fituar 324 mandate, ndërsa këtë herë ka siguruar numrin më të madh të vendeve në historinë e saj parlamentare.

Në vendin e dytë u rendit Partia Komuniste e Federatës Ruse, me 13.81% të votave dhe 40 mandate. Partia Liberale Demokratike mori 8.98% dhe 25 mandate, ndërsa Njerëzit e Rinj siguroi 7.96% të votave dhe 20 vende në Dumë.

Pjesëmarrja në zgjedhje arriti rreth 59%, sipas Komisionit Qendror të Zgjedhjeve, duke qenë më e lartë se në zgjedhjet parlamentare të vitit 2021, kur pjesëmarrja ishte 51.72%.

Zgjedhjet e këtij viti janë të parat për Dumën që nga nisja e pushtimit në shkallë të gjerë të Ukrainës në vitin 2022. Rezultatet e publikuara nga autoritetet ruse janë kundërshtuar nga kritikë dhe figura të opozitës, të cilët kanë ngritur pretendime për parregullsi dhe manipulime, ndërsa Komisioni Qendror i Zgjedhjeve i ka paraqitur zgjedhjet si të rregullta.

Rezultatet përfundimtare pritet të konfirmohen pas përfundimit të numërimit të të gjitha votave.