Një shpërthim ka shkaktuar zjarr në një depo armësh në Bullgarinë qendrore gjatë natës, duke shënuar incidentin e dytë të këtij lloji në vend brenda pak javësh. Ngjarja ka ndodhur pranë fshatit Tsareva Livada, ndërsa deri më tani nuk raportohet për persona të lënduar. Guvernatorja e rajonit të Gabrovos, Kristina Sidorova, deklaroi se zjarri ka përfshirë zonën e magazinave të fabrikës dhe se flakët po përhapen nga një depo në tjetrën.

Sipas mediave lokale, duke cituar një zyrtar të kompanisë EMCO, zjarri ka shpërthyer në një strukturë të administruar nga kjo kompani. Një tjetër shpërthim në një objekt të EMCO-s është raportuar edhe muajin e kaluar.

EMCO drejtohet nga tregtari bullgar i armëve Emilian Gebrev, i cili në të kaluarën është lidhur nga autoritetet bullgare me sulme ndaj objekteve të kompanisë. Në vitin 2024, Bullgaria lëshoi urdhër-arreste për gjashtë shtetas rusë, të dyshuar për përfshirje në shpërthimet që shkatërruan depo të EMCO-s gjatë periudhës 2011-2020. Në këto ambiente ruheshin municione të destinuara për eksport drejt Ukrainës dhe Gjeorgjisë.

Prokurorët bullgarë kanë deklaruar më herët se ekzistonte dyshimi për një lidhje mes shpërthimeve në depot e municioneve, tentativës për helmimin e Gebrev në vitin 2015 dhe shpërthimeve të vitit 2014 në depot e municioneve në Republikën Çeke. Deri tani nuk është bërë e ditur nëse shpërthimi i fundit lidhet me këto raste të mëparshme.