Administrata e presidentit amerikan, Donald Trump, mbrëmë propozoi vendosjen e tarifave shtesë prej 10 ose 12.5 për qind për importet nga 60 vende, përfshirë edhe Bashkimin Evropian, me qëllim, siç thonë autoritetet amerikane, kufizimin e tregtisë me produkte të prodhuara me punë të detyruar, e cila dëmton tregtinë amerikane.
Propozimi i Zyrës së Përfaqësuesit Tregtar të SHBA-së (USTR) është pjesë e hetimit më të fundit për praktika të padrejta tregtare sipas Nenit 301. Ky veprim vjen në kohën kur administrata Trump po përpiqet të rikthejë tarifat e jashtëzakonshme, të cilat u shfuqizuan në shkurt nga Gjykata Supreme e SHBA-së.
USTR njoftoi se do të vendosë tarifë prej 10 për qind për importet nga BE-ja, Kanada, Meksika, Britania, Tajvani, Malajzia, Pakistani, Bangladeshi dhe disa vende të tjera, ndërsa për 45 shtetet e mbetura të përfshira në hetim parashikohet tarifë shtesë prej 12.5 për qind.
Përfaqësuesi tregtar i SHBA-së, Jamieson Greer, deklaroi se mosveprimi i partnerëve kryesorë tregtarë ndaj produkteve të prodhuara me punë të detyruar krijon kushte të padrejta konkurrence për punëtorët amerikanë.
USTR gjithashtu propozoi një mekanizëm të veçantë për sektorin e tekstilit, i cili do të mundësonte hyrjen në SHBA të sasive të caktuara të veshjeve dhe produkteve tekstile me tarifa më të ulëta.
Njoftimi vjen para skadimit, më 24 korrik, të tarifës së përkohshme prej 10 për qind që administrata Trump vendosi më 20 shkurt. Ndërkohë, USTR para dy ditësh propozoi edhe tarifë prej 25 për qind për shumë produkte braziliane, si rezultat i një hetimi për praktikat e tregtisë digjitale dhe politikat tarifore preferenciale të Brazil.
