Donald   Trump e ka quajtur referendumin e fituar nga demokratët në Virxhinia, i cili u lejon atyre të rivizatojnë hartën zgjedhore të shtetit dhe kështu të fitojnë katër vende të tjera në Kongres, “të manipuluar”.

Në një postim në platformën e tij Truth Social, Trump e quajti fitoren “të pandershme”.

“Mbrëmë në shtetin e madh të Virxhinias u zhvilluan zgjedhje të manipuluara”, shkroi Trump me shkronja kapitale, i cili është mësuar të bëjë akuza për mashtrim votuesish , të tilla si ato – të cilat rezultuan të pabaza – në lidhje me humbjen e tij në zgjedhjet presidenciale të vitit 2020 kundër Joe Biden.

“Gjatë gjithë ditës republikanët po fitonin, ngazëllimi ishte i pabesueshëm, deri në fund kur, sigurisht, pati një rinumërim masiv të votave me postë. Ku e kam dëgjuar më parë këtë?”, komentoi ai me sarkazëm.

Trump shpesh e ka kritikuar aftësinë e shumë shteteve për t’u lejuar votuesve të votojnë me postë, duke pretenduar se kjo ishte një nga arsyet kryesore për humbjen e tij, të cilën ai nuk e pranon, në vitin 2020. Në fund të marsit, ai nënshkroi një urdhër ekzekutiv që synonte kufizimin e votimit me postë, por demokratët ngritën padi për ta rrëzuar atë.

Referendumi i së martës në Virxhinia shihet si një përgjigje ndaj rivizatimit të hartës zgjedhore që Trump dhe republikanët kanë filluar në shtete të tjera, siç është Teksasi.

Sot, nga 11 përfaqësuesit që Virxhinia zgjedh në Kongres, gjashtë janë demokratë. Me hartën e re zgjedhore, demokratët shpresojnë të jenë në gjendje të rrisin numrin e përfaqësuesve të tyre në madje 10, në zgjedhjet vendimtare të mesit të mandatit në nëntor.

Ripërcaktimi i zonave zgjedhore përgjatë vijave partiake dhe me kufij absurdë gjeografikë është një “recetë e vjetër” në sistemin zgjedhor të SHBA-së, një taktikë e quajtur gerrymandering. Në vitin 2025, Trump kërkoi që udhëheqja e Teksasit, një shtet i kontrolluar nga republikanët, të ripërcaktonte hartën zgjedhore për të fituar pesë vende të tjera në Kongres. Ohio dhe Karolina e Veriut ndoqën, duke synuar t’i ofronin disa vende të tjera kampit presidencial.

Demokratët reaguan duke ecur përpara me rindarjen e zonave zgjedhore në disa shtete, më së shumti në Kaliforni dhe, tani, në Virxhinia.