Vivienne Jolie, vajza 18-vjeçare e aktorëve Angelina Jolie dhe Brad Pitt, ka zbuluar për herë të parë përvojën e saj me çrregullimin e të ngrënit, duke treguar se në fillim të këtij viti ishte shtruar në spital.

E reja vendosi të ndajë historinë e saj personale përmes ekspozitës së re të pikturës, me titull “Një galeri mbi durimin tek pacientët”, ku ka përfshirë edhe fragmente nga ditari i saj personal. Në një prej shënimeve, Vivienne përshkruan gjendjen e vështirë emocionale gjatë shtrimit në spital.

“Më parë këtë vit u shtrova në spital për çrregullimin tim të të ngrënit. Isha e zemëruar, e sëmurë dhe shumë e vetmuar”, shkruan ajo. Megjithatë, 18-vjeçarja tregon se mbështetja dhe ngrohtësia e stafit mjekësor dhe fëmijëve të tjerë e ndihmuan të përballonte periudhën e vështirë.

“Mirësia dhe ngrohtësia e fëmijëve dhe stafit në spital shembën muret që kisha ndërtuar kaq lart. Nuk kam qeshur ose qarë kurrë më shumë dhe nuk kam qenë kurrë më e ndershme apo më shumë vetvetja”, rrëfen ajo.

Në një tjetër mbishkrim, që shoqëron një prej punimeve të saj artistike, Vivienne shpreh dëshirën për afërsi dhe mbështetje emocionale: “Dua një përqafim kaq shumë, trupi im ndihet kaq i ngushtë”. Ndërsa në një shënim të datës 22 prill, ajo shkruan një fjali që duket se përmbledh rrugëtimin e saj drejt shërimit: “Duhet ta lejoj veten të shembet në mënyrë që të shërohem”.

Ky rrëfim vjen në një periudhë ndryshimesh edhe në jetën personale të saj. Më 2 nëntor, Vivienne u bë fëmija i katërt i Angelina Jolie dhe Brad Pitt që hoqi ligjërisht mbiemrin “Pitt” nga emri i saj. Përmes artit, e reja ka zgjedhur të ndajë një pjesë të vështirë të jetës së saj, duke e kthyer përvojën personale në një mesazh mbi vetëpranimin, mbështetjen dhe procesin e shërimit.

© BalkanWeb
Për t’u bërë pjesë e grupit "Balkanweb" mjafton të klikoni: Join Group dhe kërkesa do t’ju aprovohet menjëherë. Grupi Balkanweb
Etiketa: