Prestige ka hedhur mbrëmjen e djeshme një tjetër hap të rëndësishëm në Sunday League, teksa ka siguruar një biletë në çerekfinalet e kampionatit të futbollit me 9 lojtarë.

Pasi e kishte mbyllur në vend të parë fazën e grupeve, Prestige kaloi me sukses pengesën e parë në ndeshjet me eliminim direkt, duke mposhtur me rezultatin e pastër 2-0 ekipin Carter, në takimin e vlefshëm për raundin 1/8-at.

Ndeshja e zhvilluar në kompleksin “Football Republic” ishte tepër interesante, ndërsa Prestige e zgjidhi atë në pjesën e dytë falë golave të Karatit dhe Shimës.

NDESHJA – Filloi menjëherë me luftë të fortë sportive nga të dyja skuadrat, të cilat kërkonin fitoren dhe kualifikimin. Me gjithë përpjekjet dhe sulmet nga të dyja kampet, pjesa e parë u mbyll me porta të paprekura.

Në fraksionin e dytë, Prestige u fut më i vendosur në fushë, duke rrezikuar që në çastet e para me Karatin, por portieri i skuadrës Carter bëri një pritje të bukur.

Megjithatë, pas një aksioni të gjatë në të 36-ën, Prestige gjeti avantazhin. Hysenbelliu kaloi një top për Bibën, me këtë të fundit që vertikalizoi bukur për Vashën, të cilin në momentin e parë e ndali portieri kundërshtar, por Karati e ndoqi mjaft mirë aksionin duke e dërguar sferën në rrjetë.

Më tej, për Prestige u bë gjithçka më e thjeshtë. Karati pati një tjetër rast të pastër, por u ndal dhunshëm me faull nga portieri, të cilit gjyqtari i akordoi çuditërisht vetëm karton të verdhë, ndonëse kishim të bënim me heqjen e një mundësie të pastër shënimi.

Prestige iu afrua përsëri golit në dy kundërsulme me Bibën, por dyfishimi do të vinte nga kapiteni Shima pas një goditjeje standarde në çastet e fundit.

Tentativa e tij e parë u ndal nga muri, por topi iu kthye sërish, për ta shkarkuar më pas në trekëndësh me një të djathtë potente, duke vulosur shifrat 2-0.