Teksa opozita ka bllokuar foltoren për të mos lejuar diskutimet në Kuvend për rendin e ditës, mazhoranca ka votuar pa debat rendin e ditës. Njëkohësisht jashtë Parlamentit po mbahet protesta, e cila vijon që prej orëve të para të mëngjesit. Më herët, teksa në sallë është i pranishëm edhe kryeministri Edi Rama u votua propozimi i kreut të Grupit të PS Taulant Balla për votim pa debat të rendit të ditës.

Kjo shkaktoi tensionim dhe opozita po proteston prej disa minutash duke goditur me shuplakë podiumin.

Kjo seancë u shoqërua me shumë ndërprerje si shkak i debateve të forta.

Në kulmin e këtyre tensioneve Niko Peleshi ka përjashtuar nga seanca kreun e grupit të PD, Gazment Bardhi pasi hodhi ujë në drejtim të kryeministrit Edi Rama teksa ai po votonte me karton.