Një zjarr ka rënë mesditën e sotme në lagjen Drapata, në Njësinë Administrative Hotolisht të bashkisë së Librazhdit , duke rrezikuar përfshirjen e një banese nga flakët.

Sipas informacionit të dhënë nga MZSH Librazhd, njoftimi për situatën është marrë rreth orës 12:22, nga Policia dhe një banor i zonës, i cili raportoi se flakët po afroheshin në mënyrë të rrezikshme drejt një banese.

Menjëherë pas marrjes së njoftimit është organizuar operacioni për izolimin dhe shuarjen e zjarrit. Në terren u angazhuan forca dhe mjete zjarrfikëse nga disa stacione.

Në operacion morën pjesë:

2 mjete zjarrfikëse dhe 7 efektivë të Stacionit të MZSH Librazhd;

1 mjet zjarrfikës dhe 5 efektivë të Stacionit të MZSH Prrenjas;

1 mjet zjarrfikës dhe 4 efektivë të Stacionit të MZSH Elbasan, të cilët ishin të stacionuar në repartin e Librazhdit;

mbi 7 forca të Policisë;

Administratori i Njësisë Administrative Hotolisht;

mbi 10 banorë të zonës;

si dhe strukturat e Emergjencave Civile të Bashkisë Librazhd, raporton gazetari Fatmir Popja.

Falë ndërhyrjes së koordinuar të forcave zjarrfikëse, policisë, banorëve dhe strukturave vendore, u bë e mundur shpëtimi i banesës që rrezikohej nga flakët.

Nga zjarri u përshkuan dhe u dogjën rreth 1 hektar sipërfaqe me barishte dhe shkurre, ndërsa raportohet se janë dëmtuar edhe disa pemë frutore.

Fatmirësisht, nuk ka persona të lënduar apo dëme në njerëz.

Operacioni për shuarjen dhe kontrollin e plotë të vatrës përfundoi rreth orës 17:00 pasi u bë e mundur neutralizimi i rrezikut për banesat dhe zonën përreth.

Ndërkohë, shkaku i rënies së zjarrit mbetet nën hetim nga Policia, e cila po punon për dokumentimin e plotë të rrethanave të ngjarjes.