Gjykata e Kombeve të Bashkuara për krime të luftës në Hagë do ta shpall vendimin kundër ish-shefit ushtarak të serbëve të Bosnjës, Ratko Mlladiç, muajin e ardhshëm, pas procesit gjyqësor që po zgjatë më tepër se pesë vjet.
Tribunali për Krime të Luftës në ish-Jugosllavi (ICTY) ka njoftuar sot se vendimi për të akuzuarin Mlladiç do të shpallet më 2 nëntor.
74-vjeçari Ratko Mlladiç është i akuzuar për gjenocid, krime kundër njerëzimit dhe krime të luftës për aksionet e tij gjatë luftës në Bosnjë-Hercegovinë, në periudhën 1992-1995, kur ai ishte komandant i forcave serbe në Bosnjë.
Ai është i akuzuar se ka mbikëqyrur masakrën e më se 8 mijë burrave e djemve myslimanë në qytetin Srebrenicë, në korrik të vitit 1995.
Vitin e kaluar, ish-lideri i serbëve të Bosnjës, Radovan Karaxhiç, që ishte koleg politik i të akuzuarit Mlladiç, është dënuar me 40 vjet burg nga Gjykata e Hagës.
Prokurorët kanë kërkuar nga gjyqtarët që ta shpallin fajtor Mlladiçqin dhe ta dënojnë me burg të përjetshëm.
Ekipi i mbrojtjes i Mlladiçit ka kërkuar lirim nga të gjitha akuzat, duke thënë se fajësia e Mlladiçit nuk është dëshmuar kurrë, dhe se prokurorët dëshirojnë ta bëjnë atë “qengj simbolik të sakrificës për fajësinë e perceptuar” të serbëve gjatë luftës, nga e cila janë vrarë më se 100 mijë vetë.
Gjykata e Hagës do ta përfundojë misionin e vet më 31 dhjetor të këtij viti, pas më tepër se 20 viteve të veprimit.
Deri tani, 83 të dyshuar janë dënuar për aksionet e tyre gjatë luftës. Shumë prej tyre kanë parashtruar ankesa ndaj dënimeve.
(BalkanWeb)
