HIMARË- Dhjetëra banorë të Dhërmiut janë mbledhur para Kishës së Shën Thanasit në Dhërmi që së fundmi është bërë “molla e sherrit” mes shtetit shqiptar dhe Kishës Ortodokse. Banorët kanë deklaruar se janë lajmëruar për ardhjen e Inspektoratit Kombëtar për Mbrojtjen e Territorit dhe se nuk do lejojnë prishjen e kishës.

“Na lajmëruan për ardhjen e IKMT nga Tirana. Nuk do lejojmë prishjen e kishës tonë. Nuk e dimë pse shteti po na e prish kishën”, kanë thënë banorët.

Pak ditë më parë, inspektorët e INUV ndërhynë për të mos lejuar restaurimin në këtë Kishë. Ky veprim u kundërshtua nga komuniteti i zonës dhe Kisha Ortodokse, e cila tha se besimtarët u përzunë nga objekti. Nga ana tjetër, INUV ndërhyri me motivin se po shkatërrohet një objekt historik. Ndërkohë që kjo përplasje ka vënë përballë edhe qeverinë shqiptare me atë greke. Ministria e Jashtme greke kërkoi shpjegime për ndërhyrjen, ndërsa Ministria e Jashtme Shqiptare tha se kjo është një ndërhyrje e nxituar në punët e brendshme nga ana e Greqisë.

(m.k/BalkanWeb)