Një ngjarje tragjike ka tronditur komunitetin në Villa Rica, në shtetin e Georgia-s në SHBA, ku një vajzë 12-vjeçare humbi jetën pas një sherri me një nxënëse tjetër pranë shtëpisë së saj.
Viktima, Jada West, u rrëzua menjëherë pas incidentit dhe u dërgua me urgjencë në spital, ku ra në koma. Pavarësisht përpjekjeve të mjekëve për ta mbajtur në jetë, ajo ndërroi jetë disa ditë më vonë, më 8 mars.
Jada ishte nxënëse në shkollën e mesme Mason Creek. Ngjarja ndodhi më 5 mars, kur ajo dyshohet se u përfshi fillimisht në një debat me një nxënëse tjetër në autobusin e shkollës. Sipas informacioneve dhe një videoje të regjistruar nga një shok klase, tensioni vazhdoi edhe pasi fëmijët zbritën nga autobusi.
Debati mes dy vajzave u përshkallëzua në një përleshje fizike në rrugë, para nxënësve të tjerë. Pamjet që qarkullojnë në rrjetet sociale tregojnë momentin e konfliktit, megjithatë ende nuk është sqaruar se çfarë e shkaktoi përplasjen.
Pas grindjes, Jada thuhet se u nis drejt shtëpisë së saj, por u rrëzua pak më vonë. Një shoqe e saj vrapoi për të njoftuar familjen, ndërsa prindërit e dërguan me urgjencë në spital.
Fillimisht ajo u dërgua në një qendër shëndetësore lokale dhe më pas u transferua në spitalin Scottish Rite, ku qëndroi në koma deri sa ndërroi jetë.
Autoritetet kanë nisur hetimet dhe pritet të kryhet autopsia për të përcaktuar shkakun e saktë të vdekjes. Ndërkohë, Departamenti i Policisë së Villa Ricës po shqyrton pamjet filmike të përleshjes për të vendosur nëse do të ngrihen akuza.
Sipas familjarëve, 12-vjeçarja ishte transferuar në këtë shkollë vetëm në janar dhe dyshohet se kishte qenë viktimë e ngacmimeve. Nëna e saj, Rashuna McLendon, u shpreh për mediat lokale se familja është e shkatërruar nga humbja. “Nuk mund ta kuptoj. Ajo ishte në tokë dhe nuk po merrte frymë. Jam shumë e zemëruar. Duhet t’u mësojmë fëmijëve tanë të duan,” tha ajo. Ndërkohë, tezja e vajzës ka publikuar videon e incidentit dhe fotografi të Jadës në rrjetet sociale, duke kërkuar drejtësi për 12-vjeçaren.
