Prej disa muajsh banorët e Baks-Rrjollit në Velipojnë vijojnë protestat e tyre kundër ndërtimit të një resorti turistik, duke pretenduar se pronat e trashëguara nga të parët e tyre janë zaptuar nga investitori. Një ndër qytetaret e prekura nga ky projekt, Luçiana Kokaj thekson se janë të vendosur t’i shkojnë deri në fund kauzës së tyre, duke mos u tërhequr nga presioni që po ushtrohet për muaj me radhë.

Protestës së tyre i janë bashkuar edhe qytetarë nga zona të tjera të vendit, të cilëve po ashtu iu janë zaptuar pronat, për t’iu hapur udhë investimeve nga palë të treta.

Protesta u shoqërua edhe me incidente, kur disa banorë tentuan të futeshin në kantierin e ndërtimit, ku ka nisur puna për ngritjen e resortit, por u ndaluan nga policia.

Leja për ndërtimin e resortit turistik është firmosur nga ish-zëvendëskryeministrja Belinda Balluku, duke futur në konflikt banorët me investitorin.