Ukraina dhe Rusia kanë akuzuar njëra-tjetrën për shkelje të armëpushimit tre-ditor të ndërmjetësuar nga Shtetet e Bashkuara.

Shtabi i Përgjithshëm i Forcave të Armatosura të Ukrainës deklaroi se “që nga fillimi i ditës, numri i sulmeve të kryera nga agresori ka arritur në 51”, duke akuzuar Rusinë për vazhdimin e operacioneve ushtarake pavarësisht marrëveshjes së përkohshme.

Ndërkohë, Forcat Ajrore ukrainase raportuan se Rusia kishte lëshuar 44 dronë që nga e premtja në mbrëmje, numri më i ulët i sulmeve me mjete ajrore pa pilot në muajt e fundit.

Nga ana tjetër, Ministria ruse e Mbrojtjes pretendoi se forcat ukrainase kishin shkelur armëpushimin me sulme të kryera me dronë dhe artileri ndaj pozicioneve ruse.

Përplasjet kanë sjellë viktima nga të dyja palët. Autoritetet ukrainase njoftuan se dy civilë u vranë dhe tre të tjerë u plagosën në rajonet Zaporizhia dhe Dnipropetrovsk pas sulmeve me dronë rusë.

Ndërkohë, në rajonin rus të Belgorod, pranë kufirit me Ukrainën, tre persona mbetën të plagosur pas një sulmi me dron ukrainas, sipas guvernatorit rajonal Vyacheslav Gladkov.

Armëpushimi tre-ditor u shpall nga Trump pas dy përpjekjeve të dështuara për ndalimin e luftimeve, fillimisht nga Ukraina dhe më pas nga Rusia, të cilat nuk u respektuan.

Menjëherë pas publikimit të mesazhit të Trump në platformën Truth Social, si Kievi ashtu edhe Moska konfirmuan pranimin e armëpushimit dhe të një shkëmbimi të madh të të burgosurve.

“Shpresojmë që ky të jetë fillimi i fundit të një lufte shumë të gjatë”, shkroi Trump, duke bërë të ditur se marrëveshja përfshin shkëmbimin e 1 mijë të burgosurve nga secila palë.

Megjithatë, këshilltari i Kremlinit, Yuri Ushakov, deklaroi se deri tani nuk ka asnjë marrëveshje për zgjatjen e armëpushimit përtej afatit tre-ditor.