Presidenti iranian Masoud Pezheskian ka deklaruar se Shtetet e Bashkuara nuk do të arrijnë “asgjë” me presionin e ri ekonomik ndaj Iranit, duke sinjalizuar se Teherani nuk do të tërhiqet përballë masave të reja amerikane. “Me masat e parashikuara nga agjencitë ekonomike të qeverisë, Shtetet e Bashkuara nuk do të arrijnë asgjë nga presioni i tyre ekonomik në këtë fazë, ashtu siç nuk arritën asgjë gjatë luftës”, tha Pezheskian, sipas agjencisë iraniane të lajmeve ISNA.
Deklarata vjen pasi sekretari i Thesarit i SHBA-së, Scott Bessent, prezantoi një plan të ri që synon të shtojë presionin ekonomik ndaj Iranit dhe të forcojë sanksionet amerikane. Uashingtoni ka paralajmëruar gjithashtu vendet e tjera që të mos marrin pjesë në shmangien e këtyre masave.
Presidenti iranian tha se Teherani mbetet i gatshëm për dialog dhe negociata, por njëkohësisht do t’i rezistojë presionit ekonomik. “Parimi ynë është të kuptojmë dhe zgjidhim problemet përmes dialogut dhe negociatave, por në të njëjtën kohë ne do t’i rezistojmë presionit ekonomik, siç kemi bërë deri më tani dhe do të vazhdojmë ta bëjmë këtë”, deklaroi ai.
Në këtë mënyrë, udhëheqja iraniane duket se kërkon të përcjellë mesazhin se sanksionet e reja nuk do ta detyrojnë Teheranin të ndryshojë qëndrimin e tij politik.
Irani: Kemi rikthyer kapacitetet ushtarake
Paralelisht me deklaratat e presidentit, ushtria iraniane ka njoftuar se ka rikthyer në funksion sistemet e armëve të dëmtuara gjatë konfliktit dhe se ka siguruar edhe pajisje të reja. Zëdhënësi ushtarak Mohammad Akramian tha për televizionin shtetëror se sistemet e dëmtuara të forcave iraniane janë restauruar, ndërsa disa sisteme të reja janë prodhuar nga industria vendase e mbrojtjes dhe të tjera janë importuar nga jashtë.
“Këto pajisje kanë rritur aftësitë tona luftarake”, tha ai. Sipas zëdhënësit, Irani ka ndërmarrë hapa për të rivendosur dhe ripozicionuar sistemet që u dëmtuan gjatë sulmeve.
Deklaratat vijnë në një kohë tensionesh të larta në Lindjen e Mesme. Konflikti mes Iranit, Izraelit dhe Shteteve të Bashkuara ka sjellë sulme të drejtpërdrejta dhe kundërpërgjigje, ndërsa Ngushtica e Hormuzit mbetet një nga pikat më strategjike të përplasjes. Një armëpushim i arritur në prill i dha fund disa javëve të bombardimeve intensive, por incidentet sporadike kanë vazhduar dhe kanë komplikuar përpjekjet për një marrëveshje afatgjatë.
Zëdhënësi iranian i ushtrisë argumentoi gjithashtu se një sulm parandalues mund të konsiderohet i ligjshëm sipas së drejtës ndërkombëtare dhe Kartës së Kombeve të Bashkuara, nëse respekton parimet e proporcionalitetit dhe domosdoshmërisë. Përplasja mes Teheranit dhe Uashingtonit mbetet kështu e hapur në dy fronte: presioni ekonomik amerikan dhe kundërshtimi politik e ushtarak i Iranit, ndërsa mundësia e një zgjidhjeje përmes negociatave vazhdon të varet nga zhvillimet e ardhshme.
