Garda Revolucionare e Iranit pretendon se ka goditur një transportues gjigant të gazit natyror të lëngshëm, pasi ky i fundit tentoi të kalonte nëpër Ngushticën e Hormuzit nëpërmjet një rruge të paautorizuar.

Sipas deklaratës së forcave iraniane, të transmetuar nga agjencia zyrtare e lajmeve IRNA, anija NV Sunshine, në pronësi të kompanisë NatWit, u godit teksa po përpiqej të kalonte në jug të ngushticës, në një itinerar që Teherani e cilëson të paligjshëm.

Garda Revolucionare pretendoi gjithashtu se kishte marrë kontrollin dhe komandën e Ngushticës së Hormuzit. Megjithatë, deri në këtë fazë, pretendimi për goditjen e anijes mbetet i bazuar në deklaratën e palës iraniane.

Ndërkohë, më herët, shërbimet e monitorimit të trafikut detar raportuan për një incident tjetër në brigjet e Emirateve të Bashkuara Arabe. Sipas kompanisë së sigurimeve detare Vanguard, një predhë e paidentifikuar shkaktoi zjarr në bordin e anijes cisternë GEM NO.2, e cila lundron nën flamurin e Panamasë.