TIRANE- Deputeti i PS, Jurgis Çyrbja ka reaguar pas deklaratës së kreut të PD, Lulzim Basha, i cili tha se në dosjen e “Toyota Yaris” ku u sekuestruan 3,4 milionë euro janë përfshirë edhe deputetët e PS Ulsi Manja dhe Jurgis Çyrbja.
Por përmes një statusi në Facebook, deputeti i PS thotë se do padisë Bashkën për shpifje dhe e sfidon që të përballet me të në gjykatë me prova dhe fakte.
“Zgjohet e pa larë sytë mendon shpifjen e radhës. E meqë zgjohet vonë, nuk i del koha as të jetë kreativ nga shpifja në shpifje! Unë nuk kam më pse të duroj baltën e Lulzim Bashës. Menjëherë padi për humbës që shpifjen e ka kthyer në mjet të mbijetesës politike. E sfidoj Lulzim Bashën të përballet me mua dhe kolegët e min në gjykatë me prova e fakte, jo vetëm për këtë akuzë po për gjithçka këto muaj ka hedhur drejt personit tim!”- shprehet Jurgis Çyrbja.
Basha u shpreh pas daljes nga Prokuroria e Tiranës se: “Në aferën Toyota Yaris janë të përfshirë përvec Taulant Balles edhe dy deputetë të tjerë të PS, Ulsi Manja dhe Jurgis Cyrbja”.
(d.d/BalkanWeb)
