Një lajm që pritej, por që i ka bërë të gjithë fansat e futbollit të buzëqeshin: Christian Eriksen largohet nga spitali i Kopenhagen pas operacionit të suksesshëm në zemër dhe rikthehet pranë gjirit familjar.
Kjo është konfirmuar nga Federata Daneze e Futbollit, e cila nëpërmjet një deklarate zyrtare shkruan:
“Christian u operua me sukses nga operacioni në zemër. Gjatë ditës ai është takuar me shokët e tij të përfaqësueses e tani është gati të kthehet në shtëpi, për të qëndruar pranë familjes”, shkruhet në njoftimin e Federatës.
Sakaq, zbulohet dhe fjalët e mesfushorit, pas operacionit, të transmetuara këto, nga vetë federata:
“Falë mbështetjes tuaj të madhe e kalova këtë sfidë. Ishte e pabesueshme të shihja e të dëgjoja aq shumë mbështetje.
Operacioni shkoi mirë, jam duke e marrë veten e po tregohem i kujdesshëm. Ishte fantastike të shikoja sërish djemtë e kombëtares duke luajtur, ndërsa tani, jam i koncentruar maksimalisht për të bërë tifo për ta në ndeshjen e së hënës ndaj Rusisë.
Kujtojmë se Eriksen, të shtunën që lamë pas pësoi arrest kardiak në fushën e lojës, në sfidën debutuese ndaj Finlandës në “Euro 2020”. Mesfushori, arriti të mbahej në jetë e ta kalone sprovën e rëndë, falë ndërhyrjes së menjëhershme të shokëve të skuadrës dhe stafit mjekësor.
Të shumtat janë zërat që e shohin Eriksen larg fushave të blerta, ndërsa pritet që në javët në vijim, fantazisti t’i nënshtrohet analizave mjekësore më të thelluara, për të parë ecurinë e ritmit të zemrës së tij.
(BalkanWeb)
