Romën dhe Lazion nuk i ka bërë bashkë as kualifikimi historik me përmbysje i verdhekuqve kundër Barcelonës në “Champions League”.
Ajo që ndodhi mbrëmë në “Olimpico” ka rezultuar një gëzim i madh jo vetëm për skuadrën, por edhe për futbollin italian, i cili vitet e fundit sukseset i ka patur me pakicë, ndryshe nga se ndodhte më parë.
Kjo ka qenë arsye që menjëherë pas rezultatit historik Juventus ka uruar Romën. Pas bardhezinjve, një sërë skuadrash të ‘Seria A’ kanë bërë të njëjtën gjë.
Mes shumë urimesh bie në sy mungesa e Lazio-s, skuadra rivale e qytetit e Romës. Sigurisht nuk është shumë për t’u habitur, pasi rivalitetin e madh mes dy skuadrave nuk mund ta zbuste një fitore e jashtëzakonshme e kundërshtarit.
Momenti i vetëm kur dy skuadrat janë bashkuar, ka ndodhur vitin e kaluar, kur Totti i tërhoq nga futbolli. Edhe në këtë rast, pavarësisht se tifozët e Lazio-s përshëndetën largimin e kapitenit legjendar, nuk harruan ta bënin me ironi.
(e.k/BalkanWeb)
