Presidenti francez Emmanuel Macron prezantoi të enjten presidencën franceze të Këshillit të Bashkimit Evropian (BE), nën moton “Rimëkëmbja, fuqia, përkatësia”.

Boshti i parë i presidencës së Francës është sovraniteti i Evropës, tha Macron në një konferencë për shtyp.

Franca planifikon të shkojë drejt një “Evrope që është e fuqishme në botë, plotësisht sovrane, e lirë në zgjedhjet e saj dhe në krye të fatit të saj”, tha Macron.

Zona Shengen do të monitorohet politikisht nga institucionet publike të BE-së për të kontrolluar qarkullimin e popullsisë së BE-së dhe emigrantëve.

Franca gjithashtu planifikon të përdorë presidencën e saj për të përcaktuar sovranitetin strategjik evropian me NATO-n dhe vendet fqinje mbi kontinentin afrikan dhe Ballkanin.

Boshti i dytë është një model i ri evropian i prodhimit, solidaritetit dhe rregullimit. “Evropa duhet të jetë në gjendje të ndjekë përparimin teknologjik dhe të marrë parasysh krizën mjedisore,” tha Macron.

Rregullimi i përmbajtjes dhe përgjegjësia dixhitale do ta lejojnë BE-në të jetë një fuqi kontinentale e dixhitalizuar, tha Macron.

“Ne gjithashtu do të çojmë përpara negociatat për krijimin e një instrumenti evropian për të luftuar kundër shpyllëzimit të importuar, i cili do të ndalojë importet në Bashkimin Evropian të sojës, vajit të palmës, kakaos dhe kafesë kur ato kontribuojnë në shpyllëzimin,” tha Macron.

Franca gjithashtu dëshiron që BE të promovojë të drejtat, vlerat ndërkombëtare dhe të sjellë një imazh dhe shembull pozitiv për komunitetin ndërkombëtar, sipas Macron.

“Evropianët duhet të dinë historinë dhe arritjet e tyre për të luftuar kundër racizmit, antisemitizmit, lajmeve të rreme dhe gjuhës së urrejtjes”, tha presidenti francez.

Gjatë konferencës për shtyp, Macron njoftoi edhe data të ndryshme takimesh me zyrtarë në lidhje me boshtet e ndryshme të presidencës franceze të Këshillit të BE-së.