Mediat shtetërore libaneze kanë raportuar se Izraeli ka kryer sulme ajrore në Jug të Libanit dhe ka urdhëruar evakuimin e banorëve. Banorët në 20 vendbanime janë urdhëruar të largohen.
Po sipas të njëjtave burime si pasojë e sulmeve ka mbetur i vrarë një person në qytetin Marrakeh, në distriktin Tyre të Libanit.

Sulmet vijnë menjëherë pasi ministri i jashtëm i Iranit tha se një marrëveshje për t’i dhënë fund luftimeve me SHBA-në është afër. Marrëveshja parashikon gjithashtu një fund të konfliktit midis Izraelit dhe Hezbollahut në Liban, tha gjithashtu Seyed Abbas Araghchi.
Kryeministri i Izraelit kishte paralajmëruar më parë se vendi i tij do të sulmonte Hezbollahun nëse ky i fundit vazhdonte sulmet kundër Izraelit verior.
Araghchi tha gjithashtu se marrëveshja përfshin rihapjen e Ngushticës së Hormuzit dhe i tha televizionit shtetëror se ajo përfshin heqjen e bllokadës amerikane ndaj Iranit. Megjithatë, ai tha se bisedimet mbi programin bërthamor të Iranit do të fillojnë më vonë.

Zyrtarët amerikanë kanë konfirmuar disa nga detajet e marrëveshjes, duke thënë se përfitimet ekonomike për Iranin do të varen nga përmbushja e detyrimeve të Teheranit.
Raportet e mëparshme nga SHBA-ja kanë sugjeruar se Libani mund të mos jetë pjesë e kësaj marrëveshjeje, me Iranin.
Lufta filloi me sulmet amerikane dhe izraelite në të gjithë Iranin më 28 shkurt, duke e shtyrë Iranin të sulmonte Izraelin dhe shtetet aleate të SHBA-së në Gjirin Persik, si dhe duke mbyllur në mënyrë efektive Ngushticën e Hormuzit, një rrugë kyçe transporti për naftën dhe gazin natyror të lëngshëm në botë.