Një përfaqësues i Britney Spears ka reaguar ndaj raportimeve që pretendonin se këngëtarja shkaktoi tension në një restorant në Los Angeles, duke lehur dhe duke mbajtur një thikë në tavolinë. Në një deklaratë për revistën People, zëdhënësi i artistes i cilësoi përshkrimet e incidentit si “të ekzagjeruara dhe mashtruese”. Sipas raportimeve të publikuara nga TMZ, ngjarja dyshohet se ndodhi në restorantin Blue Dog Tavern, ku Spears ishte ulur me dy persona të tjerë. Burime të cituara nga media pretenduan se 44-vjeçarja nisi të bërtiste dhe të imitonte lehjet e qenve, ndërsa një kliente tha se ishte ndjerë e frikësuar.
Megjithatë, përfaqësuesi i këngëtares mohoi versionin e publikuar nga mediat, duke sqaruar se Britney Spears po darkonte qetësisht me asistenten dhe truprojën e saj. “Ajo thjesht po tregonte një histori për qenin e saj që po lehonte ndaj fqinjëve. Në asnjë moment nuk vuri askënd në rrezik me një thikë. Britney po priste hamburgerin e saj”, thuhet në deklaratë.
Sipas zëdhënësit, këngëtarja po përballet sërish me të njëjtin trajtim mediatik që, sipas tij, është përdorur prej vitesh ndaj saj. “Ky shënjestrim i vazhdueshëm për çdo gjë që bën është i njëjtë me atë që ndodhi 20 vite më parë, kur media përpiqej ta portretizonte Britneyn si një person problematik. Është qesharake dhe duhet të ndalojë”, shtoi ai. Ndërkohë, gazetari Jeff Sneider, i cili ndodhej në të njëjtin restorant, e përshkroi situatën si “një eksperiencë të çmendur”, duke shkruar në rrjetin social X se disa klientë ishin trembur nga sjellja e artistes.
Ngjarja vjen vetëm pak ditë pasi Britney Spears publikoi në Instagram foto dhe video nga ajo që e quajti një “udhëtim shpirtëror”, ku shfaqej me një gjarpër të vogël në duar. Në postimin e saj, këngëtarja shkroi se gjarpërinjtë simbolizojnë “shëndet të mirë, vetëdije dhe fat”, ndërsa foli edhe për përpjekjet e saj për të qenë më e kujdesshme me veten dhe shëndetin mendor.
Në fillim të majit, avokati i saj Michael A. Goldstein pranoi fajësinë në emër të artistes për drejtim të pakujdesshëm mjeti, pas arrestimit të saj në mars në Kaliforni. Sipas vendimit të gjykatës, Britney Spears u dënua me 12 muaj lirim me kusht, një ditë burg të konsideruar të kryer, si dhe një gjobë prej 571 dollarësh. Ajo u urdhërua gjithashtu të ndjekë një program rehabilitimi për drejtimin e automjeteve në gjendje të dehur dhe të zhvillojë takime të rregullta me psikolog dhe psikiatër.
