Presidenti i PE, David Sassoli i është drejtuar me një letër kryeparlamentarit shqiptar Gramoz Ruçi dhe homologëve të tij të Ballkanit Perëndimor.

Sassoli i është përgjigjur Ruçit për shqetësimin duke thënë se BE po përpiqet të përfshijë në mekanizmat reaguesë edhe vendet e Ballkanit Perëndimor që nuk janë për momentin pjesë e Unionit.

Sipas presidentit të PE, çdo masë e marrë në nivel europian duhet të përfshijë edhe Shqipërinë dhe Ballkanin Perëndimor.

Po ashtu ai shpreh mbështetjen për çdo zgjidhje të mirë që mund të marrin këto vende në luftën kundër koronavirusit.

Disa javë më parë Ruç bashkë me homologët e Ballkanit Perëndimor i kërkuan BE të përjashtonte Ballkanin Perëndimor nga masa për ndalimin e eksportit të pajisjeve mjekësore.

LETRA E SASSOLIT NDAJ RUÇIT

Presidenti i PE, Sassoli, i shkruan Ruçit dhe kryeparlamentarëve të rajonit

Në përgjigje të letrës së para pak ditëve, në të cilën kryeparlamentarët e vendeve të Ballkanit Perëndimor kërkonin lehtësimin e rregullave për eksportet e pakisjeve mjekësore dhe shtimin e ndihmës për luftën ndaj pandemisë COVID-19, Presidenti i Parlamentit Europian, David Sassoli, u shkruan kryeparlamentarëve të rajonit se BE po merr në konsideratë këto kërkesa.

“Ne po përjetojmë një sfidë të paparë, te shkaktuar nga pandemia COVIC-19. Një problem global nuk mund të ketë zgjidhje kombëtare, dhe në shumë aspekte, kjo përhapje e Koronavirusit është një test për solidaritetin tonë evropian. Institucionet evropiane vepruan mirë dhe paraqitën një linjë unike në propozimin e zgjidhjeve evropiane – zgjidhje të bazuara në solidaritet dhe që përpiqen të mos lënë mënjanë vendet më të brishta.

Ballkani Perëndimor është pjesë e familjes tonë evropiane dhe prirja e tyre evropiane është përtej çdo dyshimi. Ndaj, jam plotësisht dakord me ju kur thoni se çdo masë e marrë në nivel evropian duhet të përfshijë vendet tuaja, dhe së paku të mos shkaktojë ndonjë pasojë negative në përpjekjet tuaja për t’u pëballur me pandeminë COVID.

Të jeni të sigurtë se BE tashmë po shqyrton mënyrat për të përfshirë rajonin tuaj në mekanizmat e tij reagues. Si President i Parlamentit Evropian mund t’ju siguroj për mbështetjen time të plotë për të gjetur zgjidhjet më të mira, në mënyrë që ju të mund të mbroheni nga efektet negative të kësaj krize. Miqtë e mirë e tregojnë dashurinë e tyre në kohë të vështira, jo vetëm në kohë të mira. Është koha për solidaritet dhe rajoni juaj duhet të përfshihet. Nëse rrimë të bashkuar, mund të dalim më të fortë nga kjo krizë.”, shkruan në letrën drejtuar kryeparlamentarëve të vendeve të Ballkanit Perëndimor, Presidenti i Parlamentit Europian, David Maria Sassoli.

(BalkanWeb)