Vladimir Putin pritet të zhvillojë këtë javë një vizitë zyrtare në Kinë, ndërsa Kremlini deklaron se ka “pritshmëri shumë serioze” për forcimin e mëtejshëm të marrëdhënieve mes dy vendeve. Presidenti rus do të qëndrojë në Kinë të martën dhe të mërkurën, vetëm pak ditë pasi Donald Trump vizitoi Pekinin për bisedime me presidentin kinez Xi Jinping. Zëdhënësi i Kremlinit, Dmitry Peskov, deklaroi se Moska dhe Pekini e konsiderojnë marrëdhënien e tyre si një “partneritet veçanërisht të privilegjuar dhe strategjik”.
Sipas tij, delegacioni rus do të përfshijë zëvendëskryeministra, ministra dhe drejtues kompanish, duke sinjalizuar rëndësinë ekonomike dhe politike të vizitës. Marrëdhëniet mes Rusisë dhe Kinës janë afruar ndjeshëm pas vendosjes së sanksioneve perëndimore ndaj Rusi për shkak të luftës në Ukrainë. Duke komentuar situatën në Ukrainë, Peskov tha se Moska pret rifillimin e procesit të paqes, i cili sipas tij ka ngecur.
Ai reagoi edhe ndaj deklaratave të Trump, i cili kishte thënë se një sulm rus me raketa ndaj një pallati në Kiev, ku humbën jetën 24 persona, mes tyre tre fëmijë, kishte dëmtuar përpjekjet për paqe. Peskov deklaroi se vëmendja duhet të fokusohet edhe te sulmet ukrainase ndaj objektivave në territorin rus. Ndërkohë, Kremlini hodhi poshtë pretendimet e presidentit ukrainas Volodymyr Zelenskyy, sipas të cilit Moska po shqyrtonte mundësinë e një sulmi ndaj një vendi anëtar të NATO-s nga territori i Bjellorusi.
“Nuk janë gjë tjetër veçse përpjekje për provokim dhe përshkallëzim të tensioneve”, tha Peskov. Në të njëjtën kohë, Ministria e Mbrojtjes e Bjellorusisë njoftoi se ushtria bjelloruse, në bashkëpunim me Rusinë, po zhvillon stërvitje për testimin e gatishmërisë në vendosjen e armëve bërthamore. Sipas autoriteteve bjelloruse, stërvitjet nuk synojnë asnjë shtet tjetër dhe nuk përbëjnë kërcënim për sigurinë rajonale.
