Legjenda e Iranit, Ali Daei e përgëzoi Cristiano Ronaldon për barazimin e rekordit të tij të të gjitha kohërave me 109 gola ndërkombëtarë.
Sulmuesi i Juventusit konvertoi në gola dy penallti në barazimin 2-2 të Portugalisë me Francën mbrëmë, duke i dërguar ata në raundin tjetër në Euro 2020.
Ai gjithashtu e çoi numrin e golave të tij në nivelin ndërkombëtar në 109 sosh, duke barazuar shifrën e vendosur nga Daei për Iranin.
“Urime për Cristiano Ronaldon, i cili tani është një gol larg thyerjes së rekordit të shënimit të golave ndërkombëtarë”.
“Jam i nderuar që kjo arritje e jashtëzakonshme do t’i përkasë Ronaldos – kampionit të madh të futbollit dhe humanistit të kujdesshëm që frymëzon dhe ndikon në jetë në të gjithë botën”.
“Vamos!”, ka shkruar Daei në profilin e tij privat në Instagram.
Ronaldo gjeti golin e 109-të në ndeshjen e tij të 178-të me Portugalinë, krahasuar me 145 paraqitjet e Daei për Iranin.
Portugalia do të përballet me Belgjikën në raundin e 16-të të Euro 2020, ndërsa në rast kualifikimi, kundërshtari më i mundshëm do të ishte Italia.
CR7 është 36 vjeç dhe bëri debutimin e tij me Portugalinë në gusht të 2003, në moshën 18 vjeç, gjashtë muaj dhe 15 ditë.
Portugezi gjithashtu vendosi një rekord të ri mbrëmë, duke u bërë njeriu i parë që shënon të paktën 20 gola midis Kupës së Botës dhe Kampionateve Evropiane.
