Në Siçili, forcat e rendit i kanë dhënë një goditje të re rrjetit që mbrojti Matteo Messina Denaron gjatë arratisjes së tij. Karabinierët e Grupit Special Operacional kanë arrestuar 3 persona me akuzën e pjesëmarrjes në shoqatë mafioze, konkretisht për ndihmë të bosit Matteo Messina Denaro.
Tre personat e arrestuar, nën hetim nga drejtësia siciliane, janë: arkitekti Massimo Gentile dhe tekniku i radiologjisë Cosimo Leone nga spitali Mazara del Vallo, të cilët akuzohen për shoqërim mafioz dhe Leonardo Gulotta, i akuzuar për bashkëpunim të jashtëm të një shoqate mafioze.
Hetimi që çoi në arrestimin e personave u koordinua nga prokurori i Palermos, Maurizio de Lucia, zëvendësprokurori Paolo Guido dhe prokurorët publikë Gianluca De Leo dhe Piero Padova.
Që nga kapja e Matteo Messina Denaro më 16 janar 2023, janë arrestuar 14 persona të akuzuar për ndihmë të bosit të mafias në kërkim; 4 prej tyre tashmë janë dënuar.
Cilët janë personat e arrestuar
Me origjinë nga Campobello di Mazara, qyteti ku Matteo Messina Denaro kaloi vitet e fundit si i arratisur, Massimo Gentile jeton në Limbiate, në provincën e Monzas, dhe mban një pozicion administrativ në Bashki.
I dyshuari është një i afërm i Salvatore Gentile, një vrasës i dënuar, dhe bashkëshorti i zonjës së vjetër të Messina Denaros, Laura Bonafede.
Sipas hetuesve, mes viteve 2007 dhe 2017, arkitekti dyshohet se i dha identitetin e tij bosit të kërkuar të mafias në disa raste, duke i mundësuar atij të blinte një makinë (FIAT 500) dhe një motoçikletë BMV, si dhe të siguronte sigurimin për dy automjetet dhe kryente transaksione bankare.
Bazuar në raportin e prokurorëve, Matteo Messina Denaro, falë rrjetit mbrojtës që ia lehtësoi statusin e të arratisurit, ishte i lirë të jetonte dhe të lëvizte nëpër territorin e tij si një qytetar i zakonshëm, me një dokument identifikimi në dukje të vlefshëm.
Lidhur me Cosimo Leone, kunatin e Massimo Gentile, prokurorët publikë e akuzojnë atë se ka siguruar që Matteo Messina Denaro, në nëntor 2020, t’i nënshtrohet një Tomografie të Kompjuterizuar të gjoksit dhe barkut dhe i ka siguruar atij një telefon celular të rezervuar gjatë shtrimit në spital. Pas shkarkimit, Leone dyshohet se i ka dorëzuar Messina Denaros CD-në e Tomografisë së Kompjuterizuar për t’ua treguar specialistëve që po e mjekonin.
Cosimo Leone do të kishte qenë për Matteo Messina Denaron, jo vetëm një kontakt thelbësor i jashtëm gjatë gjithë periudhës së shtrimit në spital, por edhe një pikë kyçe referimi brenda spitalit.
Së fundi, Leonardo Gulotta akuzohet se i ka dhënë numrin e tij të telefonit Messina Denaro midis viteve 2007 dhe 2017, për të marrë komunikime nga tregtari i makinës FIAT 500 të blerë me një emër të rremë dhe nga agjencitë e sigurimit ku policat për makinën dhe motoçikletën janë blerë duke përdorur identitetin e Massimo Gentilen.
(d.xh -Balkanweb)
