Autoritetet holandeze arrestuan të martën një azilkërkues sirian 34-vjeçar të akuzuar për krime lufte, duke shënuar arrestimin e parë të një personi në Holandë të dyshuar për kryerjen e krimeve në mbështetje të qeverisë së Sirisë.

Burri, emri i të cilit nuk është bërë i ditur nga policia, është akuzuar për krime kundër njerëzimit dhe krime lufte për arrestimin e dhunshëm të një civili në vitin 2013 dhe dorëzimin e personit tek zyrtarët sirianë, të cilët më pas e torturuan.

Sipas Shërbimit të Prokurorisë Publike Hollandeze, burri ishte anëtar i Liwa al-Quds, ose Brigadës së Jerusalemit, një fraksion i përbërë kryesisht nga luftëtarë palestinezë.

I dyshuari u transferua në Holandë në vitin 2020, aplikoi për azil dhe u vendos në qytetin e vogël jugor të Kerkrade. Policia holandeze mori një sërë informacionesh për përfshirjen e tij me Liwa al-Quds, të cilën e konsiderojnë si një organizatë kriminale.

I dyshuari do të ketë paraqitjen e tij të parë në gjykatë të premten.

Liwa al-Quds luajti një rol të madh në ofensivën e qeverisë siriane në qytetin verior të Aleppos, e cila përfundoi në vitin 2016 me kapjen e lagjeve të kontrolluara nga rebelët. Katër vitet e luftimeve në Aleppo lanë shumë anëtarë të grupit të vdekur ose të plagosur dhe përfunduan në një fitore të madhe për qeverinë e presidentit sirian Bashar Assad.

Ky është rasti i pestë i krimeve të luftës në Holandë që rrjedh nga konflikti në Siri. Nën juridiksionin universal, Holanda mund të ndjekë penalisht disa krime edhe nëse ato janë kryer jashtë vendit. Një gjykatë në Hagë dënoi një tjetër azilkërkues sirian, Ahmad al-K., vitin e kaluar për krime lufte për ekzekutimin e një ushtari të Ushtrisë Siriane, një ngjarje që u kap në video.

Gjermania ishte vendi i parë që dënoi një zyrtar nga regjimi i Asadit. Në vitin 2021, një gjykatë në Koblenz dënoi Eyad al-Gharib, një ish-anëtar i policisë sekrete të Asadit, me katër vjet e gjysmë burg për të qenë ndihmës i krimeve kundër njerëzimit.