Presidenti gjerman Frank-Walter Steinmeier do të bëjë një vizitë tre-ditore në Turqi javën e ardhshme, njoftoi Berlini.

“Turqia është një partner i rëndësishëm për Gjermaninë në rajon, në NATO dhe në G20”, tha zyra presidenciale gjermane, duke shtuar se vizita do të shënojë gjithashtu 100 vjetorin e vendosjes së marrëdhënieve diplomatike midis dy vendeve.

Gjatë vizitës së 22-24 prillit, presidenti Steinmeier do të zhvillojë bisedime politike, si dhe takime me përfaqësues të shoqërisë civile dhe organizatave të biznesit, thuhet në deklaratë.

Steinmeier është planifikuar të takohet me presidentin turk Rexhep Tajip Erdogan më 24 prill në Ankara për të diskutuar marrëdhëniet dypalëshe dhe për të shkëmbyer pikëpamje mbi çështjet rajonale dhe ndërkombëtare.

“Me vizitën e tij, Presidenti Steinmeier pranon lidhjet e ngushta midis dy vendeve dhe veçanërisht dëshiron të shprehë vlerësimin e tij për historitë e jetës dhe arritjet e miliona njerëzve me origjinë turke në Gjermani,” tha zyra presidenciale.

Presidenti gjerman do të vizitojë gjithashtu qytetin juglindor të Gaziantepit, i cili ishte ndër qytetet e goditura nga tërmeti shkatërrues i vitit të kaluar. Steinmeier do të vizitojë një shkollë në ndërtim e cila është mbështetur nga vendi i tij.

(A.A/BalkanWeb)