Qeveria e Kolumbisë dhe grupi më i madh rebel i mbetur në vend njoftuan se do të zgjasin armëpushimin e tyre aktual me një javë, ndërsa delegatët nga të dyja palët që po takohen në Kubë vazhdojnë të diskutojnë politikat që mund të sigurojnë një armëpushim afatgjatë.

Në një deklaratë të përbashkët, qeveria dhe Ushtria Nacionalçlirimtare thanë se do t’u binden kushteve të armëpushimit aktual, i cili filloi në gusht dhe ishte caktuar të përfundonte të hënën mbrëma.

Marrëveshja aktuale e armëpushimit thotë se të dyja palët nuk do të sulmojnë njëra-tjetrën dhe se një nga qëllimet e armëpushimit është “përmirësimi i situatës humanitare” të komuniteteve të prekura nga luftimet.

Megjithatë, nuk ka asnjë dispozitë në armëpushimin aktual që ndalon rebelët nga rrëmbimi i civilëve për shpërblim ose nga rekrutimi i të miturve, dy praktika që kanë vazhduar të ndodhin muajt e fundit.

Rebelët ndërkohë janë ankuar se gjatë armëpushimit aktual, ushtria ka nisur operacione në zonat nën kontrollin e tyre.

Në deklaratën e përbashkët të së hënës, të dyja palët thanë se do të vazhdojnë të diskutojnë mënyrat për të “forcuar” armëpushimin.

Qeveria e Kolumbisë ka ushtruar presion ndaj rebelëve që të ndalojnë rrëmbimet. Por grupi i ka kërkuar qeverisë mënyra alternative për të financuar operacionet e tyre dhe ka thënë se ata do të ndalojnë rrëmbimet vetëm si pjesë e një marrëveshjeje të re armëpushimi.

Në tetor, armëpushimi mes qeverisë dhe ELN-së hyri në një moment kritik kur një grup rebelësh rrëmbyen prindërit e Luis Diaz, një prej futbollistëve më të famshëm të Kolumbisë. Nëna e Diazit u shpëtua shpejt nga policia. Ndërsa babai i tij u la i lirë 12 ditë më vonë, pas protestave të shumta dhe përpjekjeve ndërmjetësuese.