Një piramidë antike, më shumë se 1100 vjet e vjetër, është shembur në Meksikë si pasojë e ndryshimeve klimatike dhe reshjeve të mëdha që pasuan një periudhë të gjatë thatësire.

E vendosur në kompleksin arkeologjik Ihuatzio në rajonin Michoacán, kjo piramidë ishte një ndër monumentet më të rëndësishme të qytetërimit Purépecha, dhe u dëmtua më 29 korrik 2024.

Kjo zonë me rëndësi të madhe historike është ruajtur në mënyrë të admirueshme ndër vite dhe përfshin edhe një piramidë tjetër, një kullë dhe një kështjellë. Piramida prej guri, me një lartësi prej 15 metrash, pësoi rrëshqitjen e njërit prej mureve anësorë si pasojë e reshjeve të dendura. Ajo kishte qëndruar në këmbë për shekuj dhe konsiderohej si një nga strukturat më të mirë-ruajtura të trashëgimisë historike në rajon.