Tifozët e futbollit përjetuan një mbrëmje të madhe, 7 gola në Bayern-Real janë shifra fantastike. Me zemër në dorë, por në fund, Vincent Kompany festoi me të drejtë për këtë sukses fantastik përballë atyre që konsiderohen “zot” në Champions. Tekniku belg veçoi faktin që ekipi i tij e gjeti veten 3 herë në dizavantazh dhe 3 herë arriti ta përmbys duke siguruar në këtë mënyrë një biletë për në fazën gjysmëfinale, aty ku do të përballen me PSG:

“Bëmë gjënë më të rëndësishme në futboll, treguam karakter. Ishin 3 herë në dizavantazh, ishte e vështirë, por në fund e përmbysëm dhe fituam 4-3. Mënyra se si luajtëm është shumë e rëndësishme, edhe për tifozët. Tani na pret PSG? Që në fillim të sezonit kemi ëndërruar për gjëra të mëdha. Do të luajmë tani kundër kampionëve në fuqi, një skuadër që janë në top formë, mezi po e presim këtë takim. Jam shumë i lumtur, por dhe shumë krenar për ekipin tim”, u shpreh Kompany.

Nuk i fshehu emocionet për këtë fitore të madhe edhe Harry Kane: “Ishte një ndeshje e çmendur që në fillim. Ata na goditën në trazicion, por në qëndruam të qetë deri në fund. Ndodhi ajo që ndodhi me Camavinga-n, por në fund arritëm të fitonim”, theksoi Harry Kane pas ndeshjes.

Në radhët e Real Madrid largohem me shumë mllef pas kësaj humbje përballë Bayern Munich. Trajneri Arbeloa u tregua i drejtpërdrejtë duke ia faturuar një pjesë të këtij dështimi gjyqtarit të takimit:

“Jemi shumë të nevrikosur dhe të zhgënjyer. Mendoj se ishte një ndeshje e madhe nga ana e të dy ekipeve, mendoi se ishte një sfidë mes të barabartësh. Kartoni i dytë i verdhë për Camavinga vendosi ndeshjen, aty përfundoi çdo gjë. Është e pabesueshme ajo që ndodhi, askush nuk arrin ta shpjegojë se si mund të nxjerrësh jashtë një lojtar në një ndeshje të tillë për një episod të tillë. Kur humbet një ndeshje në këtë mënyrë nuk mund të jesh i lumtur, pa diskutim që jemi shumë të zhgënjyer”, theksoi Arbeloa në konferencë për shtyp.