Vetëm disa ditë pasi u emërua ministër i infrastrukturës italiane, Matteo Salvini ka ringjallur ëndrrën e lashtë të paraardhësve të tij romakë për të ndërtuar një urë gjigante, me kosto miliarda euro që lidh ishullin e Siçilisë me pjesën tjetër të vendit, në një nga zonat me rrezikun më të lartë sizmik në Evropë.
Të hënën, Salvini, udhëheqësi i Lidhjes, një partner i vogël në një koalicion të ekstremit të djathtë që fitoi zgjedhjet e përgjithshme të shtatorit, i tha televizionit shtetëror italian Rai se do të vinte në lëvizje planin e diskutuar gjatë për lidhjen e Messina me Reggio Calabria, pavarësisht fakti që projekti u refuzua në mënyrë të përsëritur nga qeveritë e mëparshme për shkak të kostove të larta, praktikueshmërisë inxhinierike dhe ndikimit mjedisor.
“Gjatë pesë viteve të ardhshme, fillimi i punës për ndërtimin e urës së ngushticës është një nga synimet e mia”, tha Salvini. “Transportimi i trageteve, përveç ndotjes dhe humbjes së kohës, u kushton njerëzve më shumë në një vit sesa do të kushtonte ndërtimi i urës”, u shpreh ministri.
Ëndrra për të ndërtuar një urë mbi ngushticën e Mesinës daton që nga romakët e lashtë, të cilët, sipas disa historianëve, ishin të vetmit që e ndërtuan një të tillë. 2000 vjet më vonë, ishte radha e diktatorit të Italisë, Benito Musolini, të ëndërronte të lidhte Siçilinë me pjesën tjetër të vendit. Edhe atëherë, asgjë nuk u realizua. Më pas ishte radha e Silvio Berlusconit dhe qeverisë së tij, të cilët midis viteve 1990 dhe fillimit të viteve 2000 siguruan fonde të pjesshme nga Brukseli për skemën prej 6 miliardë eurosh, por Romano Prodi, i cili zëvendësoi Berluskonin, fitoi pushtetin dhe plani u anulua.
(BalkanWeb)
