Nëse një e dhënë nuk përbën provë, tre të tilla patjetër që po dhe tani nuk ka asnjë dyshim që Reali Madridit është në krizë. Revolucioni në skuadrën madrilene nuk po funksionon, ndërsa pa nisur mirë sezoni Zinedine Zidane dhe blerjet e bujshme të merkatos së verës janë nën akuzë. Pas humbjes së radhës 1-0 kundër Tottenham në gjysmëfinalen e “Audi Cup” është shoqëruar me reagimin e ashpër të mediave madrilene.

Dy të përditëshmet më të mëdha “AS” dhe “Marca” as që mundohen të zbusin tonet, duke kritikuar ashpër skuadrën “los blancos” për paraqitjen e radhës larg pritshmërive. “Pas “turpërimit” në ndeshjen e javës së shkuar kundër Atletico Madrid, tifozët prisnin reagimin e të besuarve të Zidane, por sërish u zhgënjyen”, lexohet në komentin e gazetës “Marca”.

Humbja kundër Tottenham ka shtuar dyshimet edhe mbi të ardhmen e Zinedinë Zidane, teksa aventura e dytë e teknikut francez në pankinën madrilene mund të përfundojë shumë më shpejt nga sa ishte parashikuar. Nën akuzë edhe transferimet e mëdha të verës, mbi të gjithë Eden Hazard. Futbollisti belg u ble me shumë zhurmë nga Chelsea, por deri tani më shumë se për cilësitë teknike, po flitet për formën fizike të futbollistit, që le për të dëshiruar.
(balkanweb)