VLORA

Pesë autorë të dyshuar janë arrestuar në Selenicë e Vlorë pasi të maskuar si policë tentuan të grabisin banesën e Fidel Caushajt në Kropisht.

BalkanWeb mëson se të arrestuarit janë Alfred Shametaj Ervin Dhima, Lulëzim Elmazaj,  Endrit Sinaj dhe Enerik Meçaj.

Po ashtu Policia i ka sekuestruar edhe dy automjete, një me të cilin u larguan dhe një tjetër i Alfred Shametajt që po udhëtonte në momentin kur u kap nga Policia.

Ngjarja ka ndodhur dy ditë më parë teksa pronari i banesës, Fidel Caushi ka rrëfyer se autorët i erdhën me automjet dhe i thanë ”Policia e Shtetit, uli duart poshtë”. Caushi nuk i ka besuar. Sipas tij ishte nata e dytë që autorët vinin për grabtije teksa kishin kontrolluar dhe nuk kishin gjetur asgjë. Madje dyshohet se kishin tentuar të grabisnin edhe banesën e vëllait të tij, Pronjo Caushi.

Ndërkohë tashmë Policia e ka zbardhur ngjarjen teksa është në kërkim të gjetjes së armës me të cilën autorët tentonin grabitjen.

NJOFTIMI NGA POLICIA

Vlorë

Zbardhet në kohë rekord tentativa për vjedhje në fshatin Kropisht, Selenicë.

Falë veprimeve të shpejta dhe profesionale identifikohen, lokalizohen dhe arrestohen pesë autorët e dyshuar të ngjarjes.

Sekuestrohen në cilësinë e provës materiale 2 automjete.

Vijon puna nga shërbimet e Policisë për gjetjen e armës me të cilën autorët do kryenin vjedhjen.

Në vijim të punës për zbardhjen e ngjarjes së ndodhur dy ditë më parë në fshatin Kropisht, Selenicë, ku persona të maskuar dhe të armatosur, duke u prezantuar si punonjës policie, kanë tentuar të vjedhin nën kërcënimin e armëve në banesën e shtetasit F. C., menjëherë, pas marrjes së informacionit për ngjarjen e ndodhur, nga Drejtoria Vendore e Policisë Vlorë u ngrit grupi hetimor, nën drejtimin e Prokurorisë së Rrethit Gjyqësor Vlorë.

Falë reagimit në kohë, veprimeve të shpejta profesionale dhe informacioneve të siguruara në rrugë operative, nga specialistët për Hetimin e Krimeve ndaj pronës në DVP Vlorë, në bashkëpunim me specialistët për Hetimin e Krimit në Komisariatin e Policisë Vlorë dhe ata Stacionit të Policisë Selenicë u bë i mundur identifikimi i autorëve të kësaj ngjarjeje dhe menjëherë u organizua puna për lokalizimin dhe kapjen e tyre.

Si rezultat, në Selenicë dhe në Vlorë u bë e mundur kapja dhe arrestimi i pesë autorëve të dyshuar të kësaj ngjarjeje, konkretisht:

A. Sh., 31 vjeç, L. E., 29 vjeç, E. S., 26 vjeç, E. M., 34 vjeç, banues në Selenicë dhe E. Dh., 39 vjeç, banues në Vlorë.

Në cilësinë e provës materiale Policia ka sekuestruar dy automjete, automjetin e markës “Benz” me të cilin u larguan autorët dhe automjetin e markës “Nissan” me të cilin udhëtonte shtetasi A. Sh. në momentin e kapjes nga Policia, tre aparate celularë dhe prova të tjera materiale.

Materialet do t’i kalojnë Prokurorisë së Rrethit Gjyqësorë Vlorë, për veprime të mëtejshme, për veprat penale “Vjedhje me armë” e mbetur në tentativë, e kryer në bashkëpunim dhe “Mbajtja pa leje e armëve luftarake dhe e municionit”.

(BalkanWeb)