Natë magjike për Roberto Mancinin! Trajneri italian udhëhoqi Al Sadd drejt një suksesi të dyfishtë spektakolar, duke u shpallur kampion i Katarit dhe duke siguruar njëkohësisht kualifikimin në çerekfinalet e Champions League aziatike.

Titulli në kampionat erdhi pa zbritur në fushë: humbja e rivalëve të Al Shamal ndaj Qatar SC i dha ekipit të Mancinit avantazhin vendimtar prej pesë pikësh, duke e bërë të pavlefshme ndeshjen e fundit. Ky është titulli i 19-të në histori për Al Sadd dhe i treti radhazi.

Por emocionet nuk mbaruan këtu. Vetëm pak orë më vonë, skuadra nga Katari u përball me Al Hilal të Simone Inzaghit në një sfidë dramatike në Champions-in aziatik. Ndeshja përfundoi 3 me 3 në kohën e rregullt, me gola dhe spektakël nga të dyja palët.

Gjithçka u vendos nga pika e bardhë, ku gabimet rezultuan vendimtare: Benzema dhe Bouabre dështuan për Al Hilal, ndërsa Al Sadd tregoi më shumë saktësi, duke siguruar kalimin në fazën tjetër.

Një natë perfekte për Mancinin, i cili shton në palmaresin e tij titullin e 15-të në karrierë dhe dërgon një sinjal të fortë edhe për të ardhmen e tij në pankinë. Nga Doha, kjo ishte një tjetër histori suksesi me firmën e një trajneri kampion.