Ukraina duhet të mobilizojë të paktën 30 mijë persona çdo muaj për të ruajtur situatën aktuale në fushën e betejës, deklaroi kreu i Zyrës Presidenciale, Kirilo Budanov.

Duke folur në forumin “Ukraina Nesër”, Budanov theksoi se ritmi i mobilizimit është i domosdoshëm për të përballuar nevojat e forcave ukrainase në front.

Sipas tij, ideja se njerëzit mund të zëvendësohen plotësisht nga teknologjia nuk është realiste. Budanov hodhi poshtë pretendimet se mobilizimi mund të braktiset dhe kapacitetet njerëzore të zëvendësohen nga sistemet teknologjike.

“Kushdo që thotë se mund ta braktisim mobilizimin dhe t’i zëvendësojmë njerëzit me disa androidë magjikë po tregon përralla. Kjo nuk do të ndodhë”, u shpreh ai.

Budanov paralajmëroi gjithashtu për pasojat që mund të ketë mungesa e personelit, duke theksuar se nevoja për mobilizim lidhet jo vetëm me frontin, por edhe me funksionimin e vendit.

“Pa mobilizim, përfundimisht mund të mos mbetet askush për të ndërtuar ekonominë”, deklaroi ai.

Komentet vijnë në një kohë kur Ukraina vijon përballjen ushtarake me Rusinë dhe përballet me nevojën për të ruajtur kapacitetet njerëzore të forcave të saj të armatosura.