Harta e botës që përdoret prej dekadash mund të pësojë një ndryshim të rëndësishëm, pasi Asambleja e Përgjithshme e Kombeve të Bashkuara ka mbështetur përdorimin e hartave që pasqyrojnë më saktë përmasat reale të kontinenteve.

Në votimin e rezolutës, 164 vende votuan pro, ndërsa Shtetet e Bashkuara ishin i vetmi vend që votoi kundër. Gjashtë vende të tjera abstenuan.

Në qendër të debatit është projeksioni i njohur Mercator, i cili përdoret gjerësisht në hartat tradicionale, por shtrembëron përmasat e sipërfaqeve, veçanërisht pranë poleve.

Një nga alternativat kryesore është projeksioni i Tokës së Barabartë, i cili synon të paraqesë më saktë raportin e madhësive mes kontinenteve.

Dallimi është veçanërisht i dukshëm te Afrika. Në hartat e bazuara në projeksionin Mercator, Groenlanda mund të duket afërsisht e krahasueshme me Afrikën, ndërsa në realitet Afrika është rreth 14 herë më e madhe se Groenlanda.

Me projeksionin e Tokës së Barabartë, përmasat e Afrikës paraqiten shumë më pranë realitetit, duke e bërë më të qartë se sa të mëdha janë disa nga kontinentet në krahasim me mënyrën se si jemi mësuar t’i shohim në hartat tradicionale.

Megjithatë, rezoluta e miratuar nga OKB-ja nuk është detyruese dhe nuk nënkupton që të gjitha hartat do të ndryshojnë menjëherë. Ajo gjithashtu nuk lidhet me përdorimin e hartave për navigim, por me mënyrën se si paraqitet vizualisht madhësia dhe forma e kontinenteve.

Ndryshimi synon të sjellë një perceptim më të saktë të botës, duke reduktuar shtrembërimet që krijohen nga projeksionet tradicionale.