Koreja e Jugut ka hequr dorë nga kërkesa që kompanitë japoneze të paguajnë kompensim për punëtorët që janë detyruar të punojnë gjatë kohës së luftës, si një përpjekje për të shpëtuar marrëdhëniet me vendin fqinj dhe për të formuar një front të bashkuar kundër Kinës.

Qeveria e Yoon Suk-yeol njoftoi të hënën pagesat për ish-punëtorët do të jepen nga qeveria e tij.

“Në çdo fushë, nga siguria te ekonomia, ne duhet të punojmë ngushtë me Japoninë, duke pasur parasysh peizazhin politik global dhe një sërë krizash komplekse rreth tij. Është në interesin tonë më të mirë të fillojmë të rregullojmë lidhjet e prishura me Japoninë. Ky është shansi ynë i fundit për ta parë këtë të ndodhë”, tha ministri i jashtëm i Koresë së Jugut pas njoftimit.

Presidenti Biden tha se vendimi shënoi një kapitull të ri novator të bashkëpunimit dhe partneritetit midis dy prej aleatëve më të ngushtë të Shteteve të Bashkuara.

“Hapat e tyre do të na ndihmojnë të mbështesim dhe avancojmë vizionin tonë të përbashkët për një Indo-Paqësor të lirë dhe të hapur. Vendet tona janë më të forta dhe bota është më e sigurt dhe më e begatë kur qëndrojmë së bashku,” tha ai.

Mosmarrëveshja shpërtheu në vitin 2018 kur gjykata supreme e Koresë së Jugut urdhëroi dy kompani japoneze, Mitsubishi Heavy Industries dhe Nippon Steel, të paguanin dhjetëra mijëra paund kompensim për 15 koreano-jugorë, ose pasardhësve të tyre, të cilët ishin detyruar të punonin për ta përpara vitit 1945.

Qindra mijëra punëtorë të tillë u rekrutuan nga kompanitë japoneze gjatë Luftës së Dytë Botërore. Shumë u detyruan të punonin kundër vullnetit të tyre, të paguar në mënyrë të pamjaftueshme ose aspak në kushte të ngjashme me skllavërinë. Qeveria e Koresë së Jugut ka njohur 220,000 viktima të punës së detyruar dhe qindra prej tyre kanë kërkuar të drejtën e tyre të dëmshpërblimit edhe në rrugë gjyqësore.

Kompensimi për punëtorët do të bëhet nga një fondacion privat i Koresë së Jugut, në të cilin kompanitë koreano-jugore që përfituan nga kompensimi i qeverisë japoneze në 1965 do t’u kërkohet të kontribuojnë.

Yoshimasa Hayashi, ministri i Jashtëm i Japonisë, tha të hënën se qeveria “nuk do të kundërshtonte” nëse kompanitë japoneze japin kontribute vullnetare në atë fond. Ai gjithashtu ripohoi një deklaratë të bërë në 1998 duke shprehur “pendim të thellë dhe falje të sinqertë” për “dëmtimin dhe vuajtjen e jashtëzakonshme” të shkaktuar ndaj koreanëve gjatë sundimit kolonial të Japonisë nga 1910 deri në 1945.

(BalkanWeb)